ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Maria Košeleva. Varastam hüvid vajehtusid

Maria Košeleva

Varastam hüvid vajehtusid

вепсский
Младописьменный вепсский
Jo kahesanden kerdan Pohjoižen, Sibirin da Edahaižen Päivnouzman igähižed vähäluguižed rahvahad vastsihe suimal, miše valita Associacijan pämehen da pämehišton. 23.-25. keväz’kud pohjoižes Salehard-lidnas mäni rahvazkeskeine forum, miččen aigan mäni-ki VIII Pohjoižen, Sibirin da Edahaižen Päivnouzman igähižiden vähäluguižiden rahvahiden suim.
Forumale tuli läz 500 mest, kudambiden keskes oliba kundaližsebroiden, ministerstvoiden, valdmehišton, tedosebroiden da joukvestišton ezitajad. kerazihe, miše pagišta aktualižid da tärktoid socialištekonomižid küzundoid, miččed koskeba vähäluguižiden rahvahiden oiktusid, oloid, varoid, keliden da kul’turan kehitoitandad da äi tošt. Foruman programm oli tehtud pätedopolišpäi, miččed om ezitadud Pohjoižen, Sibirin da Edahaižen Päivnouzman igähižiden vähäluguižiden rahvahiden kehitoitandan koncepcijas 2016. – 2025. vozikš.
Ezmäižel foruman päiväl ühtnikad pagižiba zakonantegendan paremboitusen rados da regionoiden ühthižradon kehitoitandas. Foruman avaidusel eziniba valdmehišton ezitajad, kudambiden keskes oli Prezidentan administracijan Magomedsalam Magomedov-varapämez’, Federaližen rahvahiden azjoiden agenstvan pämez’ Igor’ Barinov, Associacijan pämez’ Grigorii Ledkov da toižed. Jäl’ghe oli plenarine ištund, miččel pagištihe päküzundoiš, rahvahiden kehitoitandan rados da tulijoiš planoiš. Avaidusel mugažo oli jo pauklahjoičendan pala, kus kaik aktivistad saiba kitändkirjeižed. Toižes päivän poles rad jagoihe videhe sekcijoihe. Jogahižen sekcijan diskutiruind oli terav da koski päivänteraližid küzundoid.
26. keväz’kud kogonaižen päivän mäni tärged foruman palaPohjoižen, Sibirin da Edahaižen Päivnouzman igähižeden vähäluguižeden rahvahiden suim. Sigä delegatad valičiba Associacijan pämehen da koordinacižen nevondišton, miččehe mülüba regionoiden ezitajad. Nevondišton ühtnikad starinoičiba tegendan satusiš regionoiš da arvosteliba associacijan radod. Sid’ zavodi änestamine, miččel jo toižen kerdan Associacijan pämeheks valitihe Grigorii Ledkovad.
Foruman aigan Salehardan muzejas radoi Igähižiden vähäluguižiden rahvahiden salištandan da radonmahtoiden ozuteluz, miččel jogahine tahtnik, kut foruman ühtnik, muga lidnan eläi-ki, voi tundištadas rahvahiden kul’turanke da ühtneda miččen-se rahvahan tedomahton mastar’-klassaha.
Forumal oli sur’ kul’turprogramm-ki. Čomal koncertal adivoid ihastoitiba lahjakahad kagr- da pajosebrad ei vaiše Salehardaspäi, no Sibirin da Edahan Päivnouzman lidnoišpäi-ki. Ned mugažo čomin ozutiba ičeze kul’turad kaikile adivoile. Forum lopihe, no om taht uskta, miše nece kaik ei olend muite i pigai kaik igähižiden rahvahiden ezitajad homaičeba hüvid vajehtusid ičeze rahvahan elos.
Lugeda enamba neciš forumas da suimas voit Kodiman venänkeližil lehtpolil.