ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

P’otr Išukov. Taivhaspäi armhile randoile

P’otr Išukov

Taivhaspäi armhile randoile

вепсский
Младописьменный вепсский
Sergei Sokolovan elo-oza om čodokaz. Hän jo erasid vozid praznuičeb ičeze sündundpäiväd kaks’ kerdad vodes. Tošt sündundpäivad zavodi praznuita, konz jäi henghe lanktendan jäl’ghe vertol’otaspäi.
Vertol’otaspäi, mittušt Sergei nimiti laskvassötajaks”, ei jänd nimidä. A siš ištnuded ristitud lanksiba lumehe, mi kaiči heid. Nece tegihe Jamalas, kus Kurbas sündunu mez’ lendli erasid kümnevoččid. Hän uništi lendandoiš völ laps’aigaspäi. Hänen ezmäine opendai Valentina Pavlovna sanub, miše kaičeb Sergejan kirjutest, miččes hän jo kümnevoččen prihan kirjuti: ”Tahtoin tehtas lendajaks, leta Kurbaha da bombida kaikid neičukaižid...”. Siloi niken ei uskond, miše prihan uništuz konz-se tuleb eloho. Eskai konz hän lopi Viborgas vertol’otan opišton da zavodi leta, ei olend hänel šansoid leta kodiröunale.
Vidlas ilma süta oli amptud sijaline eläi Mihail Jegorovič Sokolov, Sergejan ded. Necein, hänen vunuk, imi ičeze ezitatoiden napenut da lujas tahtoi lasketa
taivhaspäi Ojat’-jogen vihandale randale, kuti kolnuden dedan heng.
90-vozil Sergejan laps’aigan uništuz tuli eloho. Kerdan hän lendi vertol’otal MI-8 Vologdaspäi Piterihe, löuzi kartas, miše Kurb sijadase nelläskümnes kilometras heišpäi da pakiči komandirad käta matkaspäi.
Oli nece skandaližen istorijan jäl’ghe, konz Moskvas laskihe maha tetab mirus lendai Matias Rusta. Sikš komandir sanui, miše ei sa vajehtada lendandmatkad, Pöudoiden lendajad voiba sorta heid. No ekipažan mehišt tugezi Sergejad. Sergei muga kacui sebranikoiden sil’mihe, miše oli jüged hül’gäita händast.
Tegihe Kurbas čud. Vertol’ot laskihe läz sildad päliči Ojat’-joges. Külän eläjad joksiba sennoks, a edel kaikid joksi Sergejan mam, kudamb siloi radoi počtal. Muga hän tahtoi sebata taivhaspäi laskenus poigad. Vaiše Sergejan tatale sil päiväl ei ozastund. Hän radoi edahaižil lamoil i ei kulend eskai vertol’otan judud.
Nel’l’ vot tagaze hän pördihe tagaze kodiröunale elole. Ičeze akanke kohenzi dedan pertin Maggärves, nügüd’ holdub läžujas mamas, a sulakus praznuiči ičeze 55-vottušt jubilajed.