Тексты
Вернуться к списку | редактировать | удалить | Создать новый | История изменений | Статистика | ? Помощь
Anna Deš. Karjalaini hillo kašvo Piiterissä
Anna Deš
Karjalaini hillo kašvo Piiterissä
карельский: собственно карельское наречие
Новописьменный севернокарельский
Tänäpiänä
internetissä voit löytyä äijä erilaisie videoja ta muasteri-oppija , kumpasissa opaššetah luatimah käsitöitä .Šamoin eri ryhmissä on esitetty erilaisie käsityömuasterija ta heijän luajokšie .Nyt omin käsin luajitut esinehet ollah arvošša ta hyvin šuošittuja .
Karjalaisillaki on nuori korissukšien muasteri Natalja Kibrojeva .Natalja on ruatan Oma Mua -lehen toimittajana .Nyt hiän eläy Piiterissä , ruatau šuomen kielen kurššien opaštajana ta ilmasešti järještäy kirjaštošša karjalan kielen kurššija kaikilla halukkahilla .
Natalija Kibrojeva on karjalan kielen ta kulttuurin aktivisti ta äšen Piiterissä elyässä hiän ei uhoha Karjalašta , šen kieleštä ta kulttuurista .
Viime aikoina Natalja on alkan luatie epätavallisie karjalaistyylisie korissukšie polimerisešta šavešta .Neičyt ei ainuoštah luaji niitä , kun panou omua karjalaista šieluo jokahiseh korissukšeh .
Natalja erittäin tykkyäy luatie šavista karjalaisie marjoja – hilluo , mussikkua , puolukkua , malinua – ta hänen melkein jokahisešša korissukšešša voit niitä nähä .Šamoin jokahisella luajokšella on oma romanttini ainutluatuni nimi livviksi : Muur’oin oza , Karjalan päiväine , Kolme sizärdy , Kondien magiezet , Luonnon rikkahuot , Magei elaigu , Mečän syväin , Meččähizen huondesvero , Kylmy syväin , Tuhukuun päiväine .
Kyšyin Nataljalta , konša ta mintäh hiän piätti ruveta luatimah korissukšie šavista .
– Tämä ajatuš tuli miula noin nellä vuotta takaperih , kerto neičyt .
– Alotin erikoisešta ševokšešta muovuamista varoin .
Še hyvin šakeni , ka helpošti rikkautu .Šiitä šain tietuo polimerisešta šavešta .Rupesin muovuamah šiitä erilaišie eläimie , piirrošfilmien hahmoja , pienie torttija .
Natalja piätti muovata hillon marjan , konša näki yhellä saamelaisella naisella hillonmuotosen šolen , min hiän ošti Norjašša .Nuori käsityömuasteri piätti , jotta ičeki voit luatie šamanmoisen marjan šavešta .Niin ni šynty ideja .
– Mie oikein tykkyän luatie mitänih omin käsin ta nyt miula tuli mahollisuš luatie niin kaunehen esinehen .
Enšin ei kaikki onnistun hyvin : marjat rikkauvuttih , rikeneh liijan pitälti pijin šavie kiukuašša , marjoih tuli rakoja tahi mie en voinun valita šopivua värie .Onnakko mie yritin vielä ta vielä .Nyt , konša miula jo on kokemušta , niin marjatki nävytäh tovellisilta .
Kyšymykšeh , mintäh hiän piätti muovata juuri karjalaisie marjoja , Natalja vaštasi näin :
– Muovuan vain šitä , mi on šivottu karjalaiseh teemah , esimerkiksi , karjalaisie marjoja , a nyt vielä alotin muovata kukkie .Iče olen karjalaini , ka šattu näin , jotta elän Piiteriššä .Ikävöičen Karjalua ta tahon olla lähemmäkši kotie , kävellä karjalaisešša mečäššä .Konša ollah pität lepopäivät , niin mie tulen Karjalah ta aina käyn ämmön luo Nuožjärven kyläh .Perehen kera käymmä meččäh marjašša ta šieneššä .Mie oikein šuvaičen karjalaista meččyä ta lampija !Tahtosin piiruštua kaiken šen kaunehuon , ka en šuata , šentäh muovuan šavešta .
– Ta šiula oikein hyvin še onnistuu , kehuin mie .
– Passipuo !
muhi Natalja ta lisäsi : – Karjalaiset marjat ollah oikein šuosittuja karjalaisien ta piiteriläisien kešen , vet’ hillo on Karjalan kulta , makie ta epätavallini marja , min makuo ei tiijetä šuvešša .
Tuanoin Natalja Kibrojeva ošallistu Omin silmin -ohjelmah ta näytti kaččojilla , mitein luatie hillo-korissukšen polimerisešta šavešta .
Nataljalla on oma Pohjazen čomendukset -ryhmä VKsosialiverkoštošša .Šieltä jokahini halukaš voit valita ičellä korissukšen ta tilata šen .Ičeki en voinun keštyä ta tilasin korissukšen malinan kera .
Voit šanuo , jotta Natalja kekši oman ainutluatusen karjalaisen brendin ta tämä on niin mukava !
Karjalaini hillo kašvo Piiterissä
карельский: собственно карельское наречие
Новописьменный севернокарельский
–