ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Ol’ga Dubitskaja. Parahat kielien maltajat on ilmoitettu Petroskois

Ol’ga Dubitskaja

Parahat kielien maltajat on ilmoitettu Petroskois

карельский: ливвиковское наречие
Новописьменный ливвиковский
Kevät on moine aigu, konzu pietäh kanzallizien kielien olimpiadoi. Petroskois ei ole äijiä školua, kudamis opastetah karjalan, vepsän da suomen kieldy, ga nämmien školien opastujat yksikai kilbailtih keskenäh.
Školien da linnan etuapat ollah jo jällel da nygöi on tietois, ket lähtietäh puolistamah oman da školan kunnivuo tazavallan olimpiadah.
Voittajien palkiččemine oli järjestetty täl kerdua Opastandan kehittämizen keskukses. Piätteniččän sih kerävyi äijy rahvastuolimpiadan voittajat, opastajat, vahnembat.
Pivon avai Opastandan kehittämizen keskuksen vahnembi metodistu Valentina Lukina, rahvastu tervehti keskuksen piälikkö Natalja Karmazina da Suomelas-ugrilazen školan opastai Tatjana Ignat’kova.
Kaikkiedah tänävuon olimpiadah yhtyi 58 karjalan, vepsän da suomen kieldy opastujua. Niilöis tazavallan etuapale lähtietäh vienalazet Marija Rigačeva da Mihail Lonin (4.-5. opastusvuozi), Aleksandr Petruško, Jekaterina Gorohova, Anna Rogova (9.-10. opastusvuozi), Ksenija Koltakova, Pavel Bogdanov, Maksim Kudr’avtsev (11. opastusvuozi), liygiläzet F’odor Ovčinnikov, Al’ona Barantsova, Aleksandra Lemettijeva da Darja Šmagoi (4.-5. opastusvuozi), Jelizaveta Antonova,Vladilena Zlokazova, Arina Kovalinskaja (9.-10. opastusvuozi) da Maksim Fil’čagin (11. opastusvuozi). Vepsälästy kaikkiedah on nelli hengiePolina Kononova, Jekaterina Pol’akova, Darja Ivanova (9.-10. opastusvuozi) da Natalja Timbajeva (11. opastusvuozi). Kai lapset suadih kunnivokirjazet da kniigat lahjakse.
Opastandan kehittämizen keskuksen zualan seinis sai kuulta karjalan, vepsän da suomen kieldy. Tytöt 17. gimnaaziespäi Nast’a Kamenskaja da Anželika Danilova pajatettih suomekse, Nast’a Jakovleva lugi karjalakse runonLivvin kielirahvahan mieli”, kuuluigi vepsänkielisty runuo.
Täh pidoh tuli Jelena Pietiläinen, kudai kerdoi Sever-žurnualas da lahjoitti kirjoi opastajile, kuduat valmistettih olimpiadan voittajii.
Oma Mua -lehten puoles toivotammo lapsile lykkyy tazavallan olimpiadas, kudai pietäh 1. sulakuudu Opastandan kehittämizen instituutas.