ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Natalia Vorobei. Karjalan Rahvahan Liiton toiminnašta vuotena 2016

Natalia Vorobei

Karjalan Rahvahan Liiton toiminnašta vuotena 2016

карельский: собственно карельское наречие
Новописьменный севернокарельский
Hyvät Karjalan Rahvahan Liiton jäšenet ta kaikki, ketä kiinnoštau meijän järještön toiminta ta ket ošallissutah šiihi. KRL:n halličukšen johtajana kerron täššä šeloššukšešša männyön vuuvven ruavošta. Halličukšen johtajana on toimin Natalija Vorobei, šihterinä Tatjana Baranova ta varšinaisina jäšeninä Šanteri Jeremejev, Tamara Ščerbakova, Valentina Mironova, Tatjana Klejerova ta Jevgeni Karakin.

ŠANELU TA KYYKKÄOPAŠŠUŠTA
Vuotena 2016 vuosikokouš oli pietty 17.
šulakuuta. Šen jälkeh Petroskoin valtijonyliopiston ta Šuomelais-ugrilaisen koulun kera yheššä myö järještimä ta pitimä Karjalankielini šanelu -aktijon. Šiih liitty yli 230 henkie Karjalan eri piirilöistä. Šaneluo kirjutettih aikuhiset tai koululaisetki. KRL:n halličuš pitäy tätä aktijuo hyvänä tapahtumana, mi vetäy rahvahan huomijuo karjalan kielen puoleh. Meijän mieleštä tätä aktijuo pitäy jatkua iellähki.
Šamašša kuušša KT:n Urheiluministerijön tuvella myö pitimä Kyykkä-opaššukšen. Seminarin valmistamisešta vaššattih Marija Kundoz’orova, Jevgeni Karakin, Vladimir Jartsev ta Natalja Vorobei. Opaššukšeh otti ošua Karjalan tašavallan liikunnan opaštajie ta urheilukoulujen valmistajie. Kaikkieštah 40 henkie.
Voitonpäiväkši pitimä Šovan lapšet -nimisen illačun, kumpaseh kuččuma Karjalan Rahvahan Liiton jäšeniešovan lapšieVieno Kettusen, Pekka Mikšijevin, Nikolai Filatovin, Julija Filatovan, P’otr Sem’onovin, Tamara Ščerbakovan šekä KRL:n nuorempua polvie, Petroskoin valtijonyliopiston opaštujie.

KEŠÄTAPAHTUMIE
Kešällä KRL:n aktivistit piettih kyykkäkilpailuja ta ošallissuttih Karjalan tašavallan eri pruasniekkoih ta pitoloih Petroskoissa, Karjalan piirilöissä ta Karjalan tašavallan ulkopuolella.
Näissä tapahtumissa myö näyttimä karjalaista kulttuurie ta levittimä tietoja karjalaisista. Esimerkiksi, Oma Mua -lehen toimittaja Rita Kemppainen jo monta vuotta on tutkin karjalaista kanšanpukuo ta ommellun karjalaispukuja aikuhisilla, lapšilla tahi kukloilla. Naini piti kymmenie tapuamisie, missä kerto karjalaisien perintehistä ta kanšanpuvušta.
Kešän tärkienä tapahtumana oli Šuomelais-ugrilaisien kanšojen muajilman kongressi, mi piettih Šuomen Lahešša. Kongressih ošallissuttih šeuruavat KRL:n jäšenet: Tatjana Klejerova, Natalja Sinitskaja, Irina Pogrebovskaja, Natalja Vorobei ta Arina Sem’onova. Tatjana Klejerova oli valittu Šuomelais-ugrilaisien kanšojen muajilman kongressin neuvonantokomitietan johtajakši.
Karjalan Rahvahan Liitto ta Karjalan Šivissyššeura piettih kešällä kanšainvälisie vienan kielen ta kulttuurin kurššija Louhen piirin Piäjärveššä. Tavan mukah kielikurššiloih ošallistu karjalan kielen opaštajie ta muitaki, ket ruatah karjalan kielen ta kulttuurin alalla.

"PERIODIKAŠTA" KARJALAN ŠUOMELAIS-UGRILAISIEN KEŠKUŠ
KRL:n Paginkanzu-pakinakerho ruato vuuvven ympäri.
Šen toiminnašta voit lukie Oma Mua -lehen šivuloilla. Tämän yhteyveššä kiitänOman Muantoimittajie, kumpaset käyväh KRL:n tapahtumissa ta kirjutetah meijän toiminnašta. Liiton toiminta on niin vilkaš, jotta juttuja meistä on Oma Mua -lehen melkein joka numerošša.
Oma Mua -lehen toimituštilat on kaikičči oltu karjalaisien näkeytymiskohtana. Minne KRL:n alaošaštojen karjalaiset männäh, konša tullah Petroskoih? Ken heilä on oma rotnoi tiälä? Še ei ole Kanšallisien kultturien keškuš, missä rahvašta on niin äijän, jotta KRL:lla ei ole omua huonehta, ka jäi vain pieni nurkka. Še on Oma Mua -lehti. Lehen toimittajat aina otetah vaštah omie kirjuttajie, lukijie ta tiluajie šekä Liiton jäšenie. Periodika-kuštantamon tilat hyvin paššatah karjalaisien kojiksi.
Myö tarvičemma omua kotie Petroskoissa, jotta meitä ei potkittais nurkašta nurkkah, vain annettais meilä ruatua omua ruatuo, mi on šuunnattu Venäjän Federatijon kanšallisušpolitiikan strategijan toteuttamiseh. Kiännymmä KT:n kanšallisušpolitiikan ministerin Andrei Maninin puoleh pyynnöllä šelvittyä Periodikakuštantamon Peruškirjan kyšymykšet ta ušomma, jotta šuamma käyttöhPeriodikaštaŠuomelais-ugrilaisien kielien keškukšen, missä riittäis tilua Karjalan tašavallan kantarahvahien järještöilläki.

NUORIE KIINNOŠTAMALLA
Karjalan Rahvahan Liitto ta Kanšallisien Kulttuurien keškuš jatetah karjalan kielen kurššija Petroskoissa.
Kurššilaiset opaššutah karjalan kieltä Šuomelais-ugrilaisen koulun tiloissa. Šuuret kiitokšet koulun johtajalla Natalja Barkalovalla, kumpani ymmärtäy meijän šurkien tilantehen ta antau meijän kurššilaisilla opaštuo koulun tiloissa. Suali tunnuštua, jotta Kanšallisien kulttuurien keškukšešša ei ole tilua karjalan kielen kurššija varoin, šielä joka nurkašša vain tanššitah ta pajatetah.
Myö jatamma yhteisruatuo nuorison kera. KRL:n kannatukšella Petroskoin valtijonyliopiston opaštujat peruššettih Kajahuš-nimini nuorisofolklorijoukko. Tärkeintä on še, jotta nuoret tahotah ruatua juštih KRL:n nimeltä ta kehittyä karjalaista kulttuurie ta kieltä yheššä meijän kera.

KARJALAN KIELTÄ TAVAROISSA
KRL aktiivisešti valmistau ta levittäy tavarua, kumpasissa käyttäy karjalankielisie kirjutukšie.
Myö tahomma, jotta karjalan kieli olis näkyvissä joka kohašša ta tulis tutukši Karjalašša eläjällä rahvahalla. Myö levitämmä omie kuppija, kalenterija, rintamerkkijä ta muuta tavarua internetissä ta omissa tapahtumissa. Rahvaš otetah niitä vaštah hyvällä mielin ta tämä KRL:n toiminnan šuunta on kehitettävä.
Korkieluatusien karjalankielisien tuottehien kautti rahvahalla tulou ylpeyš omašta kieleštä ta omašta kulttuurista. Pitäy vain miettie ta kekšie, mitä tuottehie myö voisima tarita rahvahalla, jotta ne oltais mukavat ta ajankohtaset heilä.

YHTEISTYÖTÄ ERI TAŠOILLA
Männyönä toimikautena KRL oli yhteisruavošša KT:n Kanšallisušpolikiikan ministerijön, Kulttuuriministerijön, Opaššušministerijön ta Urheiluministerijön kera.
Karjalan Rahvahan Liiton jäšenet ollah eksperttiloina eri komiisiloissa ta kuulutah eri neuvoštoih. Tämä tärkie yhteisruato on jatkun jo monta vuotta. Ei tietenkänä kaikki onnissu, no myö niämmä, jotta opaššuš- ta kulttuurialalla valtijo kuiteski pitäy huolta karjalaisista ta virkamiehet kuullah meitä.
Jošpa myö mänisimä oman perintehellisen toiminnan rajojen yli ta rupesima ruatamah vieläi Tervehyšministerijön tai Taloušministerijön kera, tahi, esimerkiksi, Kuletuškomitietan kera? Višših še toiminta antais enemmän hyötyö karjalaiskylillä, missä meijän rahvašta eläy. Myöhän voimma järještyä šuuremman ruavon, kuin yksistäh konserttien ta pruasniekkojen järještämini. Petroskoissa ollešša myö voimma koputtua joka ministerijön oveh ta kirjuttua heilä karjalaisien huolista ta karjalaiskylien proplemoista.
Mie kučun teitä miettimäh šitä, jotta KRL:šta tulou järještö, kumpani huolehtiu ei vain kielisaseista, vain, esimerkiksi, šiitä, jotta tie, kumpani yhistäy Koštamušta ta Jyškyjärvie olis loppujen lopukši kohennettu tai še järještö, mi šelvittäy, mintäh karjalaiskylissä Karjalan ratijo ei kuulu. Tällä hetkellä Karjalan tašavallašša ei ole mitänä järještyö, mi hoitais näitä aseita.
Lopukši tahon koroštua, jotta KRL:n tulovaisuš näkyy kaunehelta ta perspektiiviseltä. Järještön aktiiviset muamot ta tuatot maltetah karjalan kielen arvuo ta paissah omien lapšien kera karjalakši. Järještöh liittyy nuorempua šukupolvie. Vielä kerran neuvon kaikkie Karjalan Rahvahan Liiton jäšenie tilata ta lukie Oma mua -lehtie, min toimittajat ylen tarkkah kirjutetah meijänki toiminnašta.