Тексты
Вернуться к списку | редактировать | удалить | Создать новый | История изменений | Статистика | ? Помощь
Larisa Smolina. Šoutjärven päivkodile täudui 85 vot!
Larisa Smolina
Šoutjärven päivkodile täudui 85 vot!
вепсский
Младописьменный вепсский
Täl
vodel Šoutjärven päivkodile täudui 85 vot .Necikš čomaks jubilejaks päivkodin radnikad da lapsed tegiba hüvän praznikan .Hö keraziba enččid da nügüdläižid lapsiden kacujid , kucuiba lapsiden vanhembid , sebranikoid da kaks’ časud ihastoitiba adivoid melentartuižel programmal .
Avaiži praznikan Šoutjärven školan da päivkodin pämez’ Natalia Bikova da kümnenden klassan openik Arina Žerebcova .Hö tervehtoitiba adivoid lämil sanoil da toivotiba hüväd mel’t kaikuččele .A sid’ päivkodin pičuižed lapsed jäl’ghe toine tošt tuliba praznikzalaha da keraziba sanoišpäi ozatelusen : ”Sündundpäivänke , armaz päivkodi !”
Kuverz’ äi pol’vid kazvatiba päivkodin radnikad 85 vodes !Kuverz’ äi hüväd hö ehtiba antta neniš voziš šoutjärvelaižile lapsile !Hö openziba lapsid navedimha ičeze kodimad , ičeze armast röunad , maman kel’t .Lapsed kazvoiba , toižed heišpäi tegihe školan pamehikš , opendajikš , lekarikš , toižed – valdmehikš , kul’turradnikoikš , lapsiden kazvatajikš .
Sarnaline ma
Praznikal L’udmila Sergejeva ühtes penen prihaiženke Il’ušanke kucui kaikid adivoid sarnaha .Nece sarn oli Šoutjärven päivkodin elon polhe .Starin zavodihe sišpäi , miše kerdan mamad tuliba Änižjärven randale ičeze lapsidenke .Hö homaičiba vedes kuldaižen kalan .Kala oli sur’ da lujas čoma .Se küzui mamoil , miš om heiden hol’ , midä hö tahtoiba ?Mamad starinoičiba kalale , miše hö lujas holduba ičeze lapsiš , hö tahtoiba ičeze lapsile päivkodid .Kuldaine kala tegi muga , miše Šoutjärv’-posadas avaitihe päivkodi , a mamoil enamba ei olend holid , kuna jätta ičeze lapsid , kuni hö oma radol .
Elä hätken , armaz päivkodi !
Raisa Bogomolova muga navedi ičeze ezmäšt opendajad Polina Polikarpovnad , miše iče tegihe lapsiden kacujaks da 49 vot radoi ühtes päivkodiš lidnas .Praznikal Šoutjärven päivkodin pästnikad lujas äjan johtutiba enččid radnikoid .Čomad , lämäd sanad nügüdläižile päivkodin radnikoile sanuiba valdmehed , lapsiden vanhembad da toižed adivod .Šoutjärven päivkodi om lujas vauvaz , čoma , läm’ sija , kuna kaikutte adiv tahtoib pörttas möst ei üht kerdad .Ved’ sigä radaba lujas südäimeližed ristitud .Sigä oma ilokahad lapsed da hüvä emäg .Jubilejanke , Šoutjärven päivkodi i pitkid sinei elon vozid !
Šoutjärven päivkodile täudui 85 vot!
вепсский
Младописьменный вепсский