ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Galina Baburova. Iloiteldihe külläks

Galina Baburova

Iloiteldihe külläks

вепсский
Младописьменный вепсский
Kodima-lehteses kaikuččen voden starinoičem teile Päiväižen praznikas, mitte mäneb heinkus vepsläižes Šokš-küläs. Praz-nikan iniciatorad omaKeradam da kaičem-ansambl’an ühtnikad, šokšulaižed da petroskoilaižed eläjad, kudambad kaikel hengel holduba vepsän kelen kaičendas meiden mal. Eriližid spasibsanoid pidab sanuda nenile ristituile. Heiden vägel penikaine külän praznik kazvoi sureks jogavoččeks praznikaks, mittušt nügüd’ tugedab Karjalan rahvahaližen da regionaližen politikan ministerstv. Rahoitadas praznikad programman mödhe federaližes büdžetaspäi Venäman Pohjoižen, Sibirin da Edahaižen Päivnouzman igähižiden rahvahiden ekonomikaližele da socialižele kehitoitandale.
Kacmata sihe, miše aigan sirttes praznik tegihe surembaks da kerazi völ enamba rahvast, se kaiči ičeze endišt lämäd, kodihahuden il’mištod.
Tradicijan mödhe sil oli sijaližiden mastariden käzitöiden ozuteluz, parahiman änikkirbin da änikpal’mikon konkursad. Sigä-žo voi tehta ičeleze vai kenele-ni lahjaks tätüižen-kaičijan da mujada vepsläšt tradicionališt paštatestbolpirgoid, koloboid, kartohk- da šonkalitoid čajunke.
Pidab homaita sidä, miše šokšulaižel praznikal kaiken om bohat iloiteluzprogramm lapsile, lapsed iče-ki ühtneba praznikan tegendaha. Täl kerdal lugiba vepsänkeližid runoid, pajatiba vepsäks. Šokšun školan openikad eskai ozutibaNagriž”- sarnan vepsän kelel. Lapsed tegiba horovodoid, vändiba rahvahaližihe vändoihe, ozaižiba vepsläižid ozoitesid.
Iloitelihe praznikal aigvoččed-ki ristitud. Iloiteluzprogramman zavodiba praznikan ižand – ”Keradam da kaičem-ansambl’, a jatksi sidäRandaine-fol’klorgrupp Petroskoišpäi. Azj om siš, mišeRandaiženühtnikoiden enambištol jured oma Šokšušpäi da Išanišpäi. Kezal eläba sigä, sikš oma molembiden kollektivoiden ühtnikad. Ühten mugoižiš ristituišpäi om Jurii Mihailovič Mugačev. Kerdan hänen taguiči Šokšus sündui nece praznik. Hän ühtes toižiden külän aktivistoidenke kerazi lapsid, starinoiči heile vepsläižes kul’turas. Iče Jurii Mihailovič mugažo pajati praznikal vepsäks da vändi stringkartaižel.
Ezmäižen kerdan Päiväižen praznikal ezini Vepsän rahvahan hor Šoutjärvespäi. Horan ühtnikad ihastoitiba adivoid ičeze vanhoil da uzil pajoil. No eriži pidab starinoita ühtes horan ühtnikasJevgenii Fotejevas. Praznikal hän pajati kaks’ vepsläšt pajod, miččid kirjuti iče. Nece oli lujas čoma!
Praznik ühtenzoiti lapsid, norid da aigvoččid. Mugoižiden praznikoiden taguiči om toiv vepsän kul’turan kaičendaha. Praznik lahjoiči hüväd mel’t, mitte völ pit’kha lämbiti ristituiden südäimid. Siš, om taht sanuda surid spasiboid kaikile Päiväižen praznikan tegijoile.
Täl vodel Päiväižen praznik oli omištadud külän 455-voččele päiväle. Šokšun elotahon pämez’ Viktoria Butorina ozateli sen eläjid praznikanke, toivoti kaikile hüväd mel’t da lahjoiči külän aktivistoile muštlahjoid. Kuni Šokšus om mugoižid aktivižid mehid, vepsän kul’turan kaičendas ei tarbiž holduda.
Änikoiče, Šokš-külän taho! Elägaha pit’kha sinun Päiväižen praznik! Vasttamoiš toižel vodel udes!