Тексты

Вернуться к списку | редактировать | удалить | История изменений | ? Помощь

Reboin händ

Корпус: младописьменный подкорпус

Младописьменный вепсский, тексты для детей

Источник: Irina Nikitas, Kipinä. № 9, (2018), с. 6-7

Reboin händ
(вепсский)

Konz-se ani amu jänišal oli pit’k da čoma händ, a reboil oli pen’ da lühüd. Jäniš lujas ülendihe ičeze händal, kaikile živatoile mecas bahfalihe:
Jogahine mecživat ei voi sada mugošt händad!
Nacein, minai om ülev veri, ku minai om mugoi čoma händ!
A mitte tolk om sinun händas? küzeliba mecživatad. Se om pit’k, sinä ed voi peitta sidä. Se om jüged, sinä ed voi pageta hotkas.
et el’gekoi nimidä! Tal’vel om vilu irdal, a minä katamoi händal, kuti lämäl katusel, da en kül’mä.
Kondi sanui vastha:
Tal’vel ed kül’mä, ku nahk om karvakaz, peza om läm’ da pök om täuz’, a händ om muite čomitez.

No reboi pani muštho jänišan sanad. Reboi meleti, miše hän om kaikid čomemb mecas: ruzav pövut, hoikad käbälaižed, vihandad sil’mädnaku mitte käbed mod om! Vaiše čomad händad ei täudu. Vilus hän kül’mäb ilma händata pezas, i lühüd händ ei ole čoma.
Kerdan tuli mecnikoid. Jäniš pageneškanzi heišpäi, no sur’ händ telusti, tartutelihe barboihe, murtud jurihe. Jäniš joksi pit’kha, surdui, äkkid hän nägišti reboid.
Reboine, abuta minei kaitas, – pakičeškanzi jäniš. Minun jäl’ghe mecnikad mäneba, peitä mindai!
Muhouzi reboi da sanui:
Ka vajehtagamoiš händoil!
Minä jätan jäl’ged sinun händal, mäneba minun jäl’ghe, a sinä pagened.
Vajehtihe živatad händoil. Jäniš heredas hüppi, kebn da pen’ händaine oli hüvä, a reboi joksi ičezehe uruhu. Mecnikad joksiba hänen jäl’ghe, no nägištiba vaiše, kut händ ličihe uruhu. Ištuihe da varastaškanziba, konz reboi lähteb uruspäi. No ei tednugoi, miše reboin urus kaiken om varaverai, i reboi läksi mecha.
Toižel päiväl jäniš tuli reboinnoks.
Reboi-sizarut, sur’ spasib, sinä abutid minei, päzutid surmaspäi. Pakiče, midä tahtoid!
Minei ei pida nimidä, – sanui reboi, – kändihe i mäni poiš.
Hei! A händad? heikahti jäniš.
No reboi vaiše muhahti vastha.