ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

Marija Kirillova. Karjalan puisen laivarakennukšen kehityš

Marija Kirillova

Karjalan puisen laivarakennukšen kehityš

карельский: собственно карельское наречие
Новописьменный севернокарельский
Oraškuun 16. päivänä Karjalan piämiehen virkua toimittaja Artur Parfenčikov kävi istorijallis-kulttuuriseh Pol’arni Odissei -meriklubih ta puulaivanrakennukšen Var’ag-laivatelakalla. Parfenčikov tarkisti valmehie laivoja šekä niitä laivoja, kumpasie vielä rakennetah, kaččo musejoekspositijuo ta pakasi järještöjen johtajien kera.

Järvien pinta-alaštah Karjala on enšimmäisellä paikalla kuin Venäjällä, niin ni koko muajilmašša. Ei ole kummallista, jotta rahvahan laivanrakennušperintehet šäilyttih tiälä parempi, mitä Venäjän monella muulla alovehella. Tänäpiänä tašavallašša toimiu noin šata muasterie, kumpaset kuvotah venehie vanhojen keinojen mukah.
Petroskoissa puulaivoja luajitah istorijalliskulttuurisešša Pol’arni Odissei -meriklubissa ta puulaivanrakennukšen Var’ag-laivatelakalla.
Pol’arni Odissei -meriklubissa, mi oli peruššettu vielä 1978 vuotena, Artur Parfenčikov klubin johtajan Viktor Dmitrijevin kera tarkisti puulaivoja, kaččo musejoekspositijuo šekä tuttavuštu keškukšen istorijah.
Klubissa vuosien mittah on luajittu noin 40 puista purjehlaivua, kumpaset on käyty muajilman kaheššakymmeneššä muaššaEuropašša, Aasijašša, Afrikašša, Pohjois-Amerikašša. Tunnetuin purjehlaiva on pomorien venehSv’atitel’ Nikolai”.
Piämieš Artur Parfenčikov korošti, jotta Pol’arni Odissei -klubin intoilijien ainutluatuista kokemušta pitäy käyttyä nuoren šukupolven kašvattuas’s’a, a Šota-istorijallini liitto, kumpaista nyt järješšetäh Karjalašša, vois auttua meriklubie.
Šiitä Parfenčikov kävi Var’ag-laivatelakalla. Šielä luajitah projektija ta rakennetah erilaisie puisie laivoja, toisien lisäkši istorijallisieki. Var’aginjohtaja Pavel Mart’ukov esitti alovehen piäliköllä laitokšen ošaštoja.
Vuuvvešta 1991 alkuan telakalla on rakennettu monta kymmentä mouttori- ta purjeh-mouttorilaivua, šatoja venehie. Niijen luvušša on Venäjän laivašton enšimmäisen Goto Predestinatsija -linjalaivan kopijo.
Karjalan piämieš anto tašavallan vallanelimillä tehtäväkši tutkie kyšymyš mua-alan myöntämiseštä Var’ag-laivatelakalla, jotta šillä olis piäšy Onegah. Laitokšen tuotanto voit olla tarvis kuin vesimatkojen harraštajilla, niin ni Presidentin kadettikoulušša, kumpaista rakennetah nyt Petroskoissa, vet kadettien kešen pitäy kehittyä merenkulkuperintehie.
Karjalašša on ainutluatuni luontošie voit mouttorivenehellä piäššä Kižin šuarella, Vienanmerellä, Valamon šuarella, Laatokalla. Meijän pitäy ajatella šitä, jotta peruštua Onegan ta Laatokan järvilöillä šekä Vienanmerellä klasterija, missä ois palvelu ta ašema pienikokosilla laivoilla. Šemmoista infrastruktuurie pitäy olla Sortavalašša, Petroskoissa, šano Artur Parfenčikov.
Tapuamisen lopušša Karjalan piämiehen virkua toimittaja Parfenčikov ehotti käsitellä Karjalan puulaivarakennukšen kehityštä Venäjän halličukšen rinnalla toimijan Merikollegijan issunnošša.