ВепКар :: Тексты

Тексты

Вернуться к списку | редактировать | удалить | Создать новый | История изменений | Статистика | ? Помощь

“Oma Mua”

“Oma Mua”

карельский: ливвиковское наречие
Новописьменный ливвиковский
"Oma Mua" on vuvvennu 1990 perustettu karjalankieline lehti. Lehten enzimäine noumeru piäzi ilmah 8. kezäkuudu. Sen alguhpanijoinnu oldih kieliaktivistat Pekka Zaikov, Tatjana Klejerova da Ivan Akimov. Lehten haldivoiččijoikse roittihes Karjalan tazavallan Zakonoinhyväksyndy-kerähmö, Karjalan tazavallan halličus, Karjalan Rahvahan Liitto da Periodika-painamo.Oma Mua -lehten enzimäzekse piätoimittajakse oli pandu žurnalistu, karjalaine Viktor Makarov, karjalankielizen sanakirjan luadijan Grigorii Makarovan poigu. Vuvven peräs, vuvvennu 1991 "Oman Muan" piätoimittajakse tuli kalevalaine Vladimir Kettunen, hyvin tundiettu lehtentoimittai, kudai enne sidä ruadoi "Karjalan Sanomis". Toimituksen enzimäzii ruadajii oldih Vera Hämäläinen, Valentina Kiuru, L’ubov Arefjeva (Baltazar), Viktor Trošev. Lehten keskimäine painosmiäry silloi oli puolitostukaksi tuhattu palua. Silloi karjalankieline lehti oli nellisivuine. Meni aigu, lehti muutui ulgonpäi dai syväinpuoles, rodih suurembakse da sangiembakse, toimitukseh tuli ruadoh uuttu toimittajua endizien sijah. "Omas Muas" omal aijal ruattih Larisa Nikitina, Raisa Remšujeva, Ol’ga Ogneva, Valentina Mironova, Marina Mihailova, Nina Mihailova, Vladimir Romanov, Mihail Kallijev, Pavel Mihailov, Marina Viglijeva, Natalja Antropova, Jelena Migunova. Tänäpäi "Oma Mua" on kaksitostusivuine lehti karjalan kielen kahtel murdehellivvikse da vienakse. Silloi-toiči lehtes suau lugie kirjutustu tverinkarjalakse, rajakarjalakse da aniharvah lyydikse. Lehtel on oma saitu, omat sivut VKontaktes da Facebookes. Lehten lugijua eläy ymbäri muailmua: Karjalas da Ven’al, Suomes, Ruočis, Eestis, Valgoven’al. Lehten painosmiäry on 500 palua. Sen ližäkse on lehten pdf-versien tiluajua da lugijua.