Тексты
Вернуться к списку | редактировать | удалить | Создать новый | История изменений | Статистика | ? Помощь
Lazarev Ivan . Puolitostu jänöidy
Lazarev Ivan
Puolitostu jänöidy
карельский: ливвиковское наречие
Новописьменный ливвиковский
K erävyin mečästämäh
– jänöih .Mečästys tapahtui enne 8.päiviä kevätkuudu , sit onnuako se oli jo jälgimäine talvipyvvändyaigu .Vaigu lähtin koispäi – istuu susiedoin Tarziekku-koiraine , iče pitky , gu täyzi-igäine koiru , a jalgazet lyhyöt .Minä iče vaste muutin tänne elämäh , koirua vie en perustannuh , sentäh troppiin (ajoin ) jänöidy jälgie myöte da ammuin , konzu hyppiäy .
Kevätkuun algu , päiväine nouzemas , hangi kestäy suksii , hil’l’ažus , čomus , hengi pajattau .Paikassah , kuduas minä tavan mugah tropin jänölöi , on kilometrii viizi suksil da regyizil tallattuu talvitroppastu myö .Hangi huondekses on hyvä , piätin mennä kohti mečäs da suos poikki .Astummo Tarziekanke toine toizenke kiistai .Suol Tarziekku lähti pyörimäh sinne-tänne , da gu vuottamata ruvettih kivoksespäi nouzemah tedrit jällekkäi , täyzi parvikko !Ehtiin ambuo kaksi kerdua , kaksi kaunistu tedrii roittihes meijän sualuksennu .Minä kiitin Tarziekkua , poččivoičin mennyt mečästykses jiännyöl jänoin käbäläzel .Häi rubei lekuttamah händiä , nosti piän yläh – ylbeilemäh .
Muga hyväs mieles myö tulimmo sinne , kus ainos mečästimmö jänölöi .Midä sie oli tapahtunnuh !Kai suo nuorien puuloinke oli kogonah jänölöil polletettu , vikse heil jo svuad’bat zavodittihes .Pidi mennä suos ymbäri mečän reunazen kauti , gu löydiä jänöin lähtendykohtu .Lövvimmö da lähtimmö jälgie myöte .Tavallizesti jänöit ollah loitton syöndykohtaspäi , syvväh tävvet vačat dai lähtietäh iäre .Kilometrin peräs hyppäi mättähän taganpäi jänöi .Minä ammuin – jänöi juoksou , ammuin toizen kerran – juoksou .
Ga mibo tämä kummii !Menen enzimäzen ammundan kohtah – vähäine verdy lumel .Menen toizen – nuorien puuloin varbazet virutah da uvvessah vähäine verdy .Kačahtimmos sih kohtah , kuduas ammuin .Toven , vikse metrii nellikymmen roih .Midäbo ruadua ?Gu on verdy lumel , pidäy jänölöi kerätä .A päiväine ruadau omua , kylmänyh hangi da lumi sulamah ruvettih , dai lämmembi pihal rodih .Menen orožanke jänöin jägie myö , koiraine rinnal kepittäy .
Kodvazen peräs erähis kohtis hangi heitti kestämäh , minä rubein uppuomah , sukset mennäh syväh lumeh , pidäy seizuo yhtel suksel , a tostu tavata kivoksespäi .Avoi-voi !Ga nenga minä loitokse avvonastu suodu myö en piäze .Min liennou jänöi kulgenuh , toinah kogonah pagei .Yhtelläh piäzin suospäi kuuzikon reunale , kus hangi kandau , da lähtin erähän jänöin jälgie myö .Kodvazen peräs ilmestyi jänöi da puutui ihan tähtäimeh , täl kerdua väli oli lyhyembi dai lykky meijän čural .
A kus ollou koiraine ?Kučuin , viheldin .Ei tule .Midä ruadua ?Lähtin omii jälgii myö iäres , sinne , kus ammuin enzimäzen jänöin .Konzu puutuin sinne , kus punaldimmos meččäh , jälgii myö näin , ku koiraine lähti jänöin jälgie myö .Astuo jygei , jo jaksoin liijat sovat .Pidäy eččie koirastu , hyllätä jänöi .Hol’otin , viheldin pillih , ga kuulen koiran ulvondan jänöin jällen čuraspäi , da ei loitton , hyvä gu siä oli tyyni , lämmin – kevät .Kui liennen piäzin koirazelluo da näin semmoizen kuvan : koiraine oppiu astuo minulluo hangie myö , ga hangi ei kanna , häi istuhes vačale , jalgazethäi lyhyöt ollah .
Tahton auttua koirazele nosta hangele , ga hänel vačču on , gu miäččyinne .Jokse söi nellikilohizen jänöin ?Heitä velli !Lähtin jälgie myö , kačon viruu jänöi , parembi sanuo se , mi hänes jiäi , lujat vai tagajallat , dostalit kai revitetyt palazikse , paiči piädy .Midä ruadua ?Leikkain koskemattomat palat da panin huavoh , a sie kaksi tedrii , paloitettu jänöi da liij at sovat .
Lähenin koirazeh : nu , läkkä kodih .Ga eibo voi – vinguu , uppuou lumeh , söihes surmassah .Midä ruadua ?Otin koirazen , istutin reppuh sualehien da sobien piäle , salbuamattoman repun panin olgupiäh dai livuin kodihpäi – kilometrii viizi ...
Hyvä , gu ladu da rien jälgi terväh tuldih vastah .Kuda-kui piäzin kai märgy – hiestyin .Ga aijoi ihastuin , purrin Tarziekkua rien jällen troppazele , ga uvvessah koiraine rubei jiämäh jällele – vikse liijän syvves väzyi .Pidi uvvessah tungie reppuh da muga puuttuo kodih .
Kois omahizet gu nähtih minun puolitostu jänöidy , vie kodvu nagrettih , kui minä sain ambuo puolitostu jänöidy da ei uskottu , ku puoles päiväs nengoine pieni koiraine sai syvvä puolen jänöidy .Tokovai Tarziekku !
Puolitostu jänöidy
карельский: ливвиковское наречие
Новописьменный ливвиковский