Тексты
Вернуться к списку | редактировать | удалить | Создать новый | История изменений | Статистика | ? Помощь
Ol’ga Žukova. Vepsänkeližed ezitused üläopenikoiden konferincijal
Ol’ga Žukova
Vepsänkeližed ezitused üläopenikoiden konferincijal
вепсский
Младописьменный вепсский
Kaikuččen
voden Petroskoin valdkundaližes universitetas tehtas üläopenikoiden tedokonferencii .Sulakun 16.päiväl mugoine konferencii mäni Baltianmeren-suomalaižiden keliden i kul’turan tedokundal .
Täl vodel sihe ühtni 20 üläopenikad , koumanden , nelländen i videnden kursoišpäi .Hö ezitiba ičeze tedotöid suomen , karjalan vai vepsän kelil .Ezitused om kirjutadud üläopenikoiden kurstöiden da diplomtöiden pohjal erazvuiččiden temoiden mödhe : keliden kändmine , suomalaine literatur , karjalaižiden küliden tahonnimid , kelen vaihišt da grammatik .
Niiden keskes oli koume vepsänkelišt ezitust .Videnden kursan üläopenikan Maria Mironovan tem oli ”Veneh i sen paloiden nimed vepsän keles ”.Hän starinoiči , miččid venehid i niiden nimid om olnu vepsän rahvahal (oz .veneh , karbaz , ruhd’ , soim ), kacui sanoiden znamoičendoid , kävutandad paginas , etimologijad da tegendad .
Nelländen kursan üläopenik Al’ona Jegorova ičeze ezituses rindati estin da vepsän kelid , ozuti ühtejiččid pirdoid niiden grammatikas , kändoiden sistemas .Konz küzutihe , mikš hän om valičenu necidä tedotemad , Al’ona starinoiči , miše Suomes oldes hän zavodi opeta estin kel’t i homaiči , mitte lähembaine se om vepsän kel’he .Tuli taht otta keliden rindatuz ičeze kurstön temaks .
Nelländen kursan üläopenik Galina Baburova starinoiči vepsläižes pertiš , ozuti fotokuvid , eziti da tarkišteli sauvatuzvaihištod .
Ezitada ičeze temad neiččile abutiba hüväd prezentacijad i vepsänkeližed ezitused hüvin arvostadihe .Kundelmaha tedotöid oli tulnu äi rahvast : tedokundan opendajid , vanhembiden kursiden openikoid , lehtezmehid .
Konferencijan satused oma mugomad : Maria Mironova sai koumanden sijan , toižel sijal om Julija Maksimova suomenkeližen ezitusenke ”Audio-vizualine kändmine ”, a ezmäižen sijan sai VI .kursan üläopenik Ilja Mošnikov starinoittes karjalaks Utjärven tahonnimiš .
Konferencijan znamoičend om tark universitetan opendamižes .Se ozutab , miččid temoid , problemoid otaba kacmaha , tarkištelmaha üläopenikad , heiden kel’tedoid .Ühtnikoile-ki nece om hüvä praktik – pidäda ezituz surele kundliijoukule da antta vastust küzundoihe .
Vepsänkeližed ezitused üläopenikoiden konferincijal
вепсский
Младописьменный вепсский