Texts
Return to list
| edit | delete | Create a new
| Statistics
| ? Help
Sidorkin, Valerii.
Miun istorijoja
Source:
Oma mua. 2026. 28.10 (№ 42 (1832)). С. 6
Sidorkin, Valerii
Miun istorijoja
Karelian Proper
New written karelian
Tašavallan käsityömuasterien liiton jäšenen Mihail Mihalkinin Miun istorijoja -näyttely toimiu Karjalan Käsityötalošša.
Tämä on karjalaisen käsityömuasterin ainutluatuni kertomuš omašta kehitykšeštä ta nykyseštä luovašta työštä – istorija, mi ilmentyy hänen luomisesinehissä.
Mihail Mihalkinin intohimo käsitöih alko 1980-luvulla, konša hiän tapasi Vladimir Ver’ovkinin, kanšantaijon ta käsityötaijon studijon johtajan. Studijon tunnit luajennettih Mihailin ymmärtämistä kanšantaijon, muun muašša ni perintehellisien karjalaisien käsitöijen, nykyaikasista tulkinnoista.
Mihail Mihalkinin enšimmäisenä merkittävänä tevokšena oli ošallistumini Rus’ masterovaja -pannoo-kuvan kollektiiviseh luomiseh: hiän luati vaškikuvijon, mistä tuli šommitelman keškipisteh.
Myöhemmin taiteilija šiirty luomah omie korissušesinehie. Hänen taijot kašvettih vuosi vuuvvelta, ta hänen tevokšet – kuin kotitalouštavarat, niin ni elinpaikkojen koristamiseh tarkotetut esinehet – kehityttih.
Miun istorijoja -näyttely avautuu Mihail Mihalkinin muotokuvalla, min taiteilija V. Barbašin mualasi vielä tulijan tunnetun muasterin luomisruavon alušša.
Näyttelyššä esitetyt eri vuosina valmissetut luajokšet hyvin tovissetah Mihailin käsityötaijon kehittämistä. Täššä voit nähä puista pannoo-kuvua "Šampo-melliččä" vaškikuvijoineh, rukkija, arkkuja ta luatikkoja, keramisie ašteita, korissettuo vatie, aluštehie, leikkaušlautoja, tuijassuja ta šoittimien šarjua.
Monet puuesinehet ollah muijen taiteilijien mualuamie: Mihailin Nadežda-naini šekä käsityömuasterin kollegat Jelena Pleskova, Jelena Babkina, Ol’ga Potes, Jelena Papilina, Natalja Ratnikova ta Viktorija Basinova korissettih niitä.
Erityisellä paikalla Mihail Mihalkinin tuotannošša on perintehellisen karjalaisen šoittimen – kantelen – luomini. Muasteri luatiu viisi-, kymmenen- ta viisitoista -kielisie šoittimie. Toini hänen työn ala on puisien puutarhaveššokšien valmistamini. Nämä tevokšet niise ollah esillä näyttelyššä.
Lukusat valokuvat esitetäh kaččojalla Mihail Mihalkinin luovua urua eri vuosina.
Erinomani šivu muasterin ruavošša on puisien kirikköjen kupolien luomini. Tätä ruatuo voipi šanuo hänen neron tovellisekši huippukohakši. Käsityömuasterin luatimien vehkehien joukkoh kuulutah Novaja Vilga -kylän kirikön kupolit šekä Oneganiemen piirin Lelikovo-kylän kirikön ikonostasin kupolit. Niise näijen tevokšien valokuvie on esillä näyttelyššä.
Miun istorijoja -näyttelyn kävijien innoštunuot arvoštelut tovissetah taiteilijan šuosijuo.
Mihail Mihalkinin luajokših voit tuttavuštuo Karjalan tašavallan kanšantaijon ta kulttuurialottehien keškukšen Käsityötalošša 7. pimiekuuta šuaten.
