Texts
Return to list
| edit | delete | Create a new
| Statistics
| ? Help
Semoi Räpin.
Pyhä ylinozakas Petroskoin Fad’oi
Source:
Oma mua. 2026. 11.11 (№ 44 (1834)). С. 4
Semoi Räpin
Pyhä ylinozakas Petroskoin Fad’oi
Livvi
New written Livvic
Vuvvennu 2027 täydyy 800 vuottu karjalazien ristimizes hristianskoih uskoh. Jatkan paginua Karjalan muan pyhis. Täl kerdua sanelen teile pyhäh ylinozakkahah Petroskoin Fad’oih nähte. Tänävuon, vuvvennu 2026, täydyi 300 vuottu pyhän Petroskoin Fad’oin kuolendas.
Ylinozakas Petroskoin Fad’oi oli roinnuhes Anusrannal. Fad’oi oli keskenkazvuine mierolaine vahnu mies. Muzavan sobavuksen al häi pidi jouhipaidua da čieppiraudoi, rinnas oli raudaine ristu. Hänen käzis ainos oli raudaine savakko. Häi eli yksin, ainos ruadoi da pani malittuu, söi vai pyhähisty syömisty da vai sen verran, ku pyzys elos.
Konzu Petroskoin slobodas ruvettih nostamah Petroskoin zavodoi da sinne tuli elämäh tulolastu rahvastu, Fad’oi toiči jätteli yksinäheländän da kävyksendeli slobodah pidämäh paginua. Vuvvennu 1706 häi azetui elämäh slobodah, eli Neglinkajoven suun rinnal.
Slobodas lahkolazet puaksuh pagizutettih Fad’oidu uskoh näh. Ga häi ainos vastah lugi heile uskon tunnustuksen. Konzu sai vältelevii vastavuksii, tulielois tartelendois puolisti iččiedäh omassah savakol.
Ulgonävöl vahnu mies mustoitti pakiččijua, sendäh rahvas rakkahal annettih hänele pakičuspalazii, miilostinua. Sidä Fad’oi peitonpilkah jagoi kyöhile. Ylinozakas puaksuh kävyi kirikköh.
Händy kunnivoitettih, ku ei eččinyh hyödyy, oli terävyälyine da mielevy. Rahvas tiettih, ku Fad’oi on ennustai, dai monet kyzyttih hänel nevvuo da urostustu.
Slobodas oli äijy vahnu-uskostu rahvastu, kudamii karkotettih tänne Ven’an eri čuppuloispäi. Vahnan uskon noudajat vihattih Pedri-kuningastu da hänen kirikköuvvistuksii. Sendäh hyö ainos kirottih tsuarin käskys nostettuu Pedrun da Puavilan kirikkyö. Ga Fad’oi lauhtutti heidy, sendäh gu hänes vahnu-uskojat nähtih "ennevahnallizen jumalallizen eloksentavan" ezimerkin. Sendäh vaikastuttih anafemat pravoslavnoidu kirikkyö vastah, kudaman kynnyksen tagan joga sluužbas pani malittuu lauhkei Fad’oi.
Pedri Suuri puaksuh kävyi zavodoile. Enzimästy kerdua Fad’oi da kuningas vastavuttih vuvvennu 1719. Konzu Pedri-kuningas oli lähtemäs kiriköspäi pihale, rahvas ilomielin tervehtettih händy, Fad’oi pakui polvilleh hänele jalgoih. Tsuari käski nostua vahnan miehen da hätken pagizi hänen kel. Fad’oi miellytti Pedrii, da sit lähtijen händy laskiettih dvorčah. Jällespäi, jo Piiterispäi, Pedri Suuri kirjutti Petroskoin landratale Muravjovale, ku Fad’oidu tiä "pietäh čuvvonnu", da käski "vediä händy zavodoile da syöttiä sie kuolendassah". Sit aijaspäi lähtijen vahnu mies rubei elämäh mökkizes, kudai seizoi palazen peräs pohjaspuoleh Pedrun da Puavilan kiriköspäi.
Vuvvennu 1724 tsuari jälgimäzen kerran kävyi Petroskoin zavodoile. Tsuarin lähtijes vahnu Fad’oi ennusti, kui häi terväh kuolou. Pedri Suurel rodih pahamieli da häi käski pidiä silmäl Fad’oidu. Ga hänen käskyläzet ahkeroittih liigua da pandih Fad’oi tyrmäh.
Vähästy enne kuolendua Pedri Suurele juohtui mieleh Fad’oin ennustus. Häi kyzeli, ongo mies hengis da tiijustahuu, ku Fad’oidu pietäh tyrmäs, työndi Petroskoin zavodoile viestinsuattajan käskynke piästiä ylinozakas välläle da kuolendassah maksua hänele penzetty.
Konzu vahnu mies piästettih välläle, häi kieldävyi penzies da ielleh eli miilostinan, pakičuspalazien vuoh.
Pyhä Fad’oi kuoli 21. elokuudu vuvvennu 1726. Oli pandu muah Voskresenskoin kirikön vastaspäi.
Petroskoilazien dengoih 1800-vuozien lopus oli nostettu kivine časounu ylinozakkahan vahnan miehen kalman piäl. Fad’oidu muga äijäl kunnivoitettih, ga linnalazet azetettih časounan keskel mruamorukalmukivi. Se oli čomendettu parčal da kogonah peitetty kukil.
Vuvvennu 1930 kalmu hävitettih, kalmukivi annettih kodirannan muzeih. Sit se kunnelienne hävii. Čuvvon vuoh säilynyh mruamorukivi ylinozakkahan Fad’oin kalmalpäi, kudai löyttih sit kohtas, kus oli časounu, on aijas Aleksandr Nevskoin kirikön tyves.
Fad’oi pandih Petroskoin jeparhien pyhien luvetteluh 26. ligakuudu 2000.
Ylinozakastu Petroskoin Fad’oidu pietäh Petroskoin linnan taivahallizennu puolistajannu. Hänen mustuo kirikkö pruaznuiččou 3. syvyskuudu da toizen kerran – Karjalan pyhien pruazniekannu, 3. päivänny kezäkuudu.
