Texts
Return to list
| edit | delete | Create a new
| Statistics
| ? Help
L’ubov’ Baltazar.
Piäsköin viesti
L’ubov’ Baltazar
Piäsköin viesti
Livvi
New written Livvic
Jumal muailman ku luadi,
Konzu ruado hänen lopui,
Kyzyi Reboil: – Sinun mieles,
Mi on paha minun mieros?
Hätken elävien keskes
Kuundeli da kačoi Reboi.
Silloi viizas vie ei olluh,
Vastata vie maltoi kohti.
Tuli Jumalalluo, sanoi:
–Ylen hyvin luajit kaiken,
Yksi olendo on pahin,
Kävelöy se kahtel jallal.
Jumalal se viesti oli
Igävy da kibei ylen –
Kahtel jallal kävelijiä
Parahannu pidi Jumal...
Lähäl Piäsköi lendi, kuuli,
Huomai Luojan mielen pahan:
–Luodu olendo on hyvä,
Kaikis pahin mieros – mado!
Jumal uskoi viestii Piäsköin,
Jätti olendon sen mieroh,
Ristikanzan ozan andoi.
Unohtua ei voinnuh Mado,
Murendeli Piäsköin pezän,
Mečäspäi sen iäres ajoi.
Ristikanzu linduu kiitti:
–Tule, ole, Piäsköi-lindu,
Minun levon alle sinun
Pezäl ainos löydyy tilua.
Piäsköi suvaiče ei riidua,
Kodih tuou sovun hyvän,
Mečän unohti dai vihan,
Eigo malta eliä muijal.
Ristikanzoin keskes eläy,
Pajattamah panou keviäl,
Viestit igävät kai vedäy,
Sijah tuou hyvän mielen.
