Texts
Return to list | edit | delete | Create a new | history | Statistics | ? Help
Visotskaja Marina , Ivanova Milana . Pakasiko Väinämöini elfien kielellä?
Visotskaja Marina , Ivanova Milana
Pakasiko Väinämöini elfien kielellä?
Karelian Proper
New written karelian
Kirja
, kumpani muutti elämän
Vuotena 1911 John Ronald Reuel Tolkien näki kirjan , kumpani muutti hänen elämän .Še oli William Kirbyn enklannin kielellä kiäntämä "Kalevala .Urokšien Mua ".Tolkien oli šilloin 19 vuuvven vanha .
John Ronald Reuel Tolkien on muailman kuulusa fantasija-kirjuttaja , kielimieš , opaštaja ta kiäntäjä .Hänen kirjoista on luajittu šatasen kiännöštä ta monisen monta yrityštä toistua hänen loistavua mäneššyštä .
Konša Tolkien oli 30 vuuvven vanha , hiän piäsi Oksfordin professorin virkah .Tulija kirjuttaja oli muailman parahie kielimiehie .
"Kalevala " tuli kirjuttajan luovatien lähtökohakši . Mäni monta vuotta ennein kun vuotena 1955 Tolkien kerto kirjasešša Wystan Hugh Audenilla eepossan ta šuomen kielen vaikutukšešta hänen tevokših .
"Šuomen kieli pani käyntih kertomukšien generattorin ", mainičči hiän .
Koko hänen mifologija on šyntyn "Kalevalašta ", Kullervon juonešta alkuan .
Šormukšien herra
"Šormukšien herra " (enkl .The Lord of the Rings ) on John Ronald Ruel Tolkienin romani , muailman kuulusin fantasijatevoš .
Romani on kirjutettu yhtenä kirjana , ka še tuli niin šuurekši , jotta enšimmäiseššä painokšešša oli juattu kolmekši ošakši : "Šormukšen vellehyš ", "Kakši linnua ", "Kuninkahan jälelläh tulo ".Monet ollah šitä mieltä , jotta tämä romani on enšimmäini fantasijatevoš , kumpani tuli lajin klassisekši tevokšekši .
Kirja on kiännetty 38 kielellä .Kirjan pohjalla Piter Jacksonin luatima filmi on muailman kačotuimpie .
Još šie tahtonet tietyä Tolkienin muailman istorijua alušta loppuh , n’euvottelemma alottua luvennan Silmarillion-kirjašta .Še on fantasijamuailman pohja ta šen juoni yhistäy kaikki Tolkienin juonet .
Keški-Muan muailma
Kun J .R .R .Tolkien "loi paperilla " uuvven muailman , hiän kekši šitä varoin paičči muantietuo ta istorijua , vieläi monimutkasen kielien järješšelmän ta muutoman elfien kielen murtehen .Še johtuu tämän kanšan pitäštä elämän taipalešta .Esimerkiksi , yhen elfien murtehen , quenyan , pohjana on šuomen kieli .
Vaikka quenyan pohjana on šuomi , ka Tolkien šitä kekšiessä ošittain käytti vielä latinan ta kreikan kielien oikeinkirjutušta ta fonetiikkua .Iče quenyašta tuli Šormukšien herra -trilogijan ta "Legendariumin " pohja .
Vaikka "Šormukšien herran " aikana kieli jo ei ollun enämpi käytöššä , še tuli Keški-Muan latinan kielekši (Tolkien šano šitä "elfien latinan kielekši ").Nykyjäh quenyan kielellä paissah Tolkienin muailman fanit .
Quenyalla on oma eriluatuni kirjakieli , ka monella yksityiskohalla še on šuomen ta karjalan kielien šamannäköni .
Ešimerkiksi , quenyan šijajärješšelmäššä on šamoin genetiivin , akkusatiivin , allatiivin , ablatiivin , inessiivin ta instruktiivin analogija .
Ušeimičči šanojen lopušša on a-vokali , kieleššä on ai -, au -, oi -, ui -, ua -, eu -, ea -, iu -diftongija (moina – lähini , veuro – vasalli , ronua – ajokoira , coirea – elävä ).
Täššä on esimerkiksi muutoma šuomen ta karjalan kielen šamannäköni šana : tul – tulla , anta – antaa , antua , tereva – terävä .
Yhtehisie kohtie Kalevalan kera
Šuomen kulttuuri oli peruštana šekä KeškiMuan kielilöillä , jotta juonella .Kuulusan Kalevala-runoelman vaikutušta löytyy ušein kirjuttajan tevokšista ta Kullervon elämä innoššutti häntä kirjuttamah Hurinin lapšie -romanin ta Turin Turambarin starinan .Yrityš kirjuttua ošua "Kalevalašta " uuvveštah , erityisešti Kullervon starinua , tuli "Legendariumin " alukši .
Tämä yrityš – Kullervon istorija – oli painettu vašta vuotena 2010.Turinin starinašša on šuorie rinnakkaisilmijöitä Kullervon elämäh : ahissuš , paha oša , kauheita veikon ta čikon välisie šuhtehie ta ičentappo lopušša .
Šamoin "Silmarillionissa " on eepossan juonta lähellä olijie ošie : päivän ta kuun varaššanta , puu , kumpani kašvau taivahah šuaten .
"Kalevalan " vaikutuš Šormukšien herra -trilogijah on pienempi , paremmin še näkyy henkilöissä . Esimerkiksi , viisahan tietäjän Gendalfin ta arvautukšellisen luonnon yštävän ta iänen taikavoimua käyttäjän Tom Bombadilin kuvissa näkyy Väinämöisen piirtehie .
Šamoin yhtehisekši voipi šanuo taikaesinehtä , kumpasen ympärillä juoni kehittyy ."Kalevalašša " še on kummallini Šampo-melliččä , a Šormukšien herra -trilogijašša – tietyšti iče Valtašormuš . Molommilla näillä esinehillä on erinomaisie ominaisukšie , molommat ollah muasterin takomie ta hävittih starinan lopušša – melličän kappalehet upotah mereh , šormuš katou laavah .
Kalevala-eepossa on tärkie tevoš , kumpasen merkityštä šekä Šuomen ta Karjalan , jotta koko muailman kulttuurilla on vaikie yliarvoštua .Šentäh še ei näytä kummalliselta , ka šilti on mukava löytyä karjalais-šuomelaisien runojen ta mielehisen taikamuailman yhtehyttä .
Pakasiko Väinämöini elfien kielellä?
Karelian Proper
New written karelian
"