Texts
Return to list
| edit | delete | Create a new
| history
| Statistics
| ? Help
Nadežda Vasiljeva.
Isänmualla omissettu elämä
Source:
Oma mua. № 7, 2025, p. 4
Nadežda Vasiljeva
Isänmualla omissettu elämä
Karelian Proper
New written karelian
Borovoin keškikoulušša juhlallisešti avattih Šankarin pulpetti. Še on omissettu koulun kahella piäštökkähällä, kahella šankarilla – Aleksandr Nesinilla ta Igor’ Klimenkolla.
Nuoret prihat – Aleksandrilla ijäkši jäi 19, a Igorilla – 21 vuotta. Hyö oli šynnytty ta kašvettu eri aikah ta äšen eri vuosišualla, ka heijän lyhyöššä ta šankarillisešša elämäššä on yksityiskohta – heijän tahto ta valmehuš puoluštua Isänmuata.
Poikien kohtalot oltih omalla tavallah šamanlaisie: hyö ei oltu parahie tai hyvie opaštujie koulušša, ta toičči šuatettih proplemoja opaštajillah. Ka kuin Aleksandrilla, niin ni Igorilla jo kouluvuosista miärätty luonnon piäviiva – puoluštua näkemyštäh loppuh šuaten, olla joukon johtajana. Šamoin prihoja yhisti heijän rakkahuš vanhempih, čikkoloih ta veikkoloih. Heijän lyhyt ta tapahtumarikaš elämä katkesi niin aivoin…
NEUVOŠTOŠOTILAš ALEKSANDR NESIN
Aleksandr Nesin aikaseh kavotti tuattoh. Hänellä, ihan pikku pojalla, piti ottua omilla harteilla monet kotitehtävät. Saša ei šuattan valehtua ta luikertua, ta aina šilmih kaččuon pakasi totta.
Vuotena 1985, konša tuli kučču armeijah, Aleksandr ruato Artur Černišovin nuorisoprikatissa Borovoin alavaraštošša, missä hyö šuoritettih puutavaran katkaisuo. Juuri šielä priha šai enšimmäistä ruato- ta urheilukoulutušta, mi autto häntä armeijašša voittua nuoren šotilahan kurššin kaikki tehtävät ilman šuurie ponnissukšie.
Aleksandr Nesin palveli neuvoštošotilahien rivilöissä Afganistanissa. Hiän palveli rehellisešti, eikä sualiutun vaikeukših. Priha kirjutti muamolla ta kerto omista arkipäivistä ta koti-ikävyöštä. Joka kirjani alko šanoilla: "Muamoseni, rakaš, kallis, kaikista armahin".
Saša kirjutti, jotta hänellä on kaikki hyvin ta jotta hiän varmašti myöštyy kotih. Prihua huoleššutti, mitein šielä eletäh hänen joki ta meččä? Ta kyšy muamuo työntyä hänellä kirjasešša muutoma koivulehti ta oman ikkunan alla kašvajan päivänkakkaran kukka.
Elämän viimeseh päiväh šuaten Aleksandr šäilytti niitä kallehie tervehyisie kotimuašta omašša muistikirjašša, missä jätti kirjutukšen:
"Ken oli studentti, še näki nuoruon. Ken oli šotilaš, še tuntou elämän. Šitä varoin, jotta kennih vois pityä kukkie käsissäh, myö piemmä konehpyššyjä…"
Kuartin rivimieš Aleksandr Nesin kuatu 9. pakkaiskuuta 1986. Še oli prihan 13. šotaoperatijo. Yksikön ošana hiän šeurasi autokolonnua, mi joutu kapinoiččijien tulitukšeh marššin aikana. Ošašto, missä Aleksandr toimi, kierti kapinoiččijien ašemat, työnti ne pois rohkiella hyökkäykšellä ta ešti vihollisen meininkie šytyttyä autot. Dušmanin pulikka vei nuoren miehen henken.
TYKKIMIEŠ IGOR’ KLIMENKO
Igor’ Klimenko lopetti Borovoin keškikoulun yhekšännen luokan ta tuli Koštamukšen politeknisen kolledžin opaštujakši. Koululaisena, a šiitä studenttina hiän tottu luottamah iččieh. Prihalla oltih lämpimät šuhtehet vanhempieh ta nuoremman veikkoh kera.
Koulutukšen jälkeh Igor’ kučuttih armeijah ta hiän opaštu tykkimiehen taitoja.
Vuotena 2022 priha luati piätökšen jatkua šotilašpalveluo šopimukšen mukah. Erityisen šotaoperatijon alušša Tamanin mouttorikivyäriošašton ičeliikkujien ašeijen tykkiošašton vanhempi šuuntaja nousi puoluštamah Tuatonmuata.
Lyhyissä SMS-viestilöissä Igor’ Klimenko kirjutti, jotta hänellä on kaikki hyvin ta lupasi myöštyö kotih elävänä ta tervehenä. Ka ei myöštyn. Vuuvven 2023 17. šajekuuta Igor’ kuatu puoluštuas’s’a natsistien vallašta Donbassin muata.
Nuorempi Maksim-veikko, kumpani yrittäy olla kuin vanhempi veikko kaikešša, rikeneh kaččou uuvveštah Igorin työntämyä videoviestie, missä on tuven ta toivon šanoja, jotta kaikki tulou hyvin. Še lyhyt video, min Igor’ kuvasi ennein taisteluo, tuli viimesekši.
Maksim Klimenko staraiččou piteliytyö vanhemman veikon neuvoja – vet hiän on pojalla esimerkkinä kaikešša. Nyt Maksim opaštuu Piiterin valtijon rautatieyliopiston Petroskoin ošaštošša ta tietäy, jotta još Isänmua kuččuu apuh, ni hiän noušou puoluštamah šitä.
Tuatonmua korkiešti arvošti Borovoin prihojen urošruatuo. Rohkevuošta ta urhollisuoš ta Aleksandr Nesin oli palkittu Ruškien tähen kunnivomerkillä, a Igor’ Klimenko – Rohkevuon kunnivomerkillä. Kuoloman jälkeh.