Тексты
Вернуться к списку
| редактировать | удалить | Создать новый
| Статистика
| ? Помощь
Bogdanova Natalja.
“Kalevalan mua” on täyttänyh 20 vuottu
Источник:
Oma mua. 2026. 04.11 (№ 43 (1833)). С. 7
Bogdanova Natalja
“Kalevalan mua” on täyttänyh 20 vuottu
карельский: ливвиковское наречие
Новописьменный ливвиковский
Sankt-Peterburgas piettih tovelline etnogruafien pruazniekku. Linnu 26. ligakuudu rodih karjalazien ainavoluaduzen kul’tuuran keskuksekse, ku sinä piän ilmoitettih kahtendenkymmenenden Kalevalan mua 2026 - festivualin lopputuloksii. Festivualii pietäh joga vuottu vuvves 2006 algajen. Kahteskymmenes vuvves pieni alguhpano kazvoi suureh pidoh, kuduah kerdyy tuhanzii rahvahii.
Tänävuon kilbuprogrammah yhtyi 8813 hengie Ven’an 487 eländykohtaspäi: Moskovas, Piiteris, Karjalas, Komis, Udmurties, Čuvašies, Murmanskan alovehel, Krimas, Donetskoin da Luganskoin tazavalloispäi. Se tovestau, ku festivuali rodih kogo muan projektakse, kuduah yhtyy eri kanzoin da kul’tuuroin rahvastu.
Sankt-Peterburgan Kanzalližuskois kunnivoittih festivualin taidokilvoin voittajii da finalistoi. Tänä vuon oli eri kilbua: lapsien piirustuksien kilbu "Kalevala – päiväzen mua", dizainankilbu "ETNOmotiv", Etnotur-kilbu da fotokilbu "Karjalan muan ilmiet". Fotokilvas kolmandele sijale piäzi nuožarveläine Alina Gapejeva.
Periodikagi yhtyi festivualih. Pivos julguamuo ezitti Jekaterina Jeremejeva, kudai sai enzimäzen sijan graaffine dizain -nominatsies. Kilbah Jekaterina työndi omassah taidoruavot, kudamih sai viritysty Karjalan perindöllizes kul’tuuras da Kalevalas: Toive-pajotansijoukon mustomerkilahjua, graaffistu mualavustu.
– Festivuali rodih minule tovellizekse ammattinkazvun da taidoeččoloin taibalehekse. Sai oppie uuttu keinuo, nähtä, kui ruatah kolleegat da ozuttua omua neruo, sanoi Jekaterina Jeremejeva.
Tämän vuvven festivualih käi suuri joukko Jessoilaspäi. Heijän sanoin mugah pivos oli äijy mieldykiinnittäjiä ezitysty. Iče jessoil’čat kerrottih, mittuine kaunis on Nuožarven kylä, mittustu suavutustu on kyläs da midä maksau kaččuo sinne tulduu. Festivualilazet kerrottih uuzis turistumatkois, verdailtih Vlastelin kolets -kirjua da Kalevala-runoelmua.
Festivualin kaikis tärgevin tulos on se, ku Karjalua suvaijah kaikin, meijän muah nähte pidäy kerduo da ylbeillä sidä.
