Тексты
Вернуться к списку
| редактировать | удалить | Создать новый
| Статистика
| ? Помощь
Alina Gapejeva.
Herran hommis – runohuoh
Источник:
Oma mua. 2026. 04.11 (№ 43 (1833)). С. 7
Alina Gapejeva
Herran hommis – runohuoh
карельский: ливвиковское наречие
Новописьменный ливвиковский
Nuožarven kylän piälikkö ezitti omassah kirjutetun kirjan.
Priäžän kyläs piettih illačču, kuduan nimekse pandih "Dušoju s vami govor’u". Rahvas kerryttih yhteh kuundelemah uudeh kirjah nähte. Sen kirjutti L’ubov Ponomar’ova, kudai maltau yhtistiä vagavan da jyrgien Nuožarven kylän piälikön ruavon da sydämellizen taidoneron.
Kirju on monipuoline da hengenliikuttai. Sit yhtes ollah Tulan alovehel lapsekkahas perehes kazvanuon tytön mustelemizet, hel’l’u tundo omih lapsih da bunukkoih kohti, naizen oza. L’ubov’ Nikolajevna on kolmen lapsen muamo da viijen bunukan buabo, sendäh perehen aihe on hänen runohuos tärgevin. Liiriekan rinnal suau lugie vagavua tevostu luondoh, Ižänmuallizen voinan da erillizen voinuoperatsien urholoih nähte.
Priäžän lohkon eläjät jo tundietah L’ubov’ Ponomar’ovua runoilijannu. Hänen runoloi hyö kuutih paikallizis pruazniekois da lugiettih internetas. Äijät inehmizen runot on pandu pajoloikse. Kirjan prezentatsies niidy pajatti jessoil’ču L’udmila Kozlova.
– Enzimäi minä kirjutin iččeh niškoi, sanoi L’ubov’ Nikolajevna. – Ga sit mieleh juohtui, voizinhäi kerätä kai kirjutetut yksih kanzih.
Illačus sai kuulta pajuo da runuo, omahizien da kolleegoin hyvittelylöi. Tämä pido on hyvä ezimerki: vagavas da tärgies ruavos olii ristikanzu löydäy aigua da vägie, ku hänen hengenvalgei nägys rinnal eläjile.
