Texts
Return to list
| edit | delete | Create a new
| Statistics
| ? Help
Brendojev Vladimir.
Itköy neidoi (Kanzanpajon sovitus)
Brendojev Vladimir
Itköy neidoi (Kanzanpajon sovitus)
Livvi
New written Livvic
Kevätkezän päivän pitkän
Meren rannal neidoi itköy.
Taivahalpäi päivöi pastau,
Neidoi meres kasan kastoi.
Ehättäjiä neidoi vuottaš,
Kaččou alah: soudau tuattah.
"Tatoi, ethäi ole vieras,
Piästä minuu suarel iäres".
"Liipoilinduženi, vuota.
Eulo kunne ottua tuatal.
Veneh täyzi ven’an verkuo".
Itkemäh jäi neidoi herky.
Lounatpuoleh päivy kiänäh.
Itköy neidoi täydeh iäneh.
Valuu silmis abei kyynäl.
Kaččou: veneh merel tyynel.
"Kenen neče ven’oi soudau?
Toinah millo sijua löydyy"?
Nägöy – ven’ois soudau naine,
Hänen muamo-kandajaine.
"Mamoi, ven’ois sijua siästä,
Minuu suarel iäres piästä"!
"En voi piästä sinuu siepäi,
Veneh täyzi ruočin riäpöil.
Luaskau linduženi, vuota,
Kuni riäpöit Ruoččih suatan".
Senke veneh kadoi silmis.
Istuu neidoi, pimei pilvi,
Itköy-ryöhkäy, ulvou vienoh.
Soudau ven’oi hänen iäneh.
Yksikai ku siivet kajoil,
Huškau airot, kuuluu pajo.
Neidoi kyynälsilmät nosti,
Ken on ven’ois – kerras tostih.
Briha rannas airot lykkäi,
Neidoi vastai, huulih ukkai,
Sanoi hälle iänel hembiäl:
"Sinä kaikkii armahembi".
Briha neidoin yskäl kandoi
Veneheh säh, meren randah.
Kuudamvalgies veneh soudau.
Herky syväin hellän löydäy.
