Texts
Return to list
| edit | delete | Create a new
| Statistics
| ? Help
L’ubov’ Baltazar.
Nybläzet
L’ubov’ Baltazar
Nybläzet
Livvi
New written Livvic
Senčois kangas seizoi, t’outa hurstii kudoi
Ylen äijy meijällyö silloi nybliä suitui.
Rahvas ribuu tarittih, lämmiä pidi kaikil,
Talvel joga talois hurstit pandih lattiel.
Ei nimidä maksettu... kelle oli lammastu,
Toiči villua annettih – ligahistu, ammustu.
Näpyttämäh villazii minuu harjaitettih,
Ligahizii sormuzii kylys livotettih.
Sovat pidi revitellä, leikkuo nyblät iäres,
Sit vie kerih kerie... nyblät jiädih.
Lajittelin tukkuzil, azettelin riädyh,
Suvainnuh en raudazii, mit voinusovis jiädih.
Net on minul palkakse, nagroi t’outa hil’l’azeh,
Tervehembäl jallal painoi suksii ildazin.
Ryvvin stuavoin alači, kačoin alahanpäi
Kui net sovat vierahat t’outa hurstih pani.
Meni t’outa keittämäh, minä ryvvin ielleh,
Stuavoin suksil liedžuo eihäi minuu kielty.
Rubei t’outa nieglomah, minä kažizenke
Suurii ribukeräzii lykin pitkin pertii.
Kaikil kudoi hurstii, kaikil andoi lämmiä,
Akkiloičči meidy, autoi meijän muamua.
Vuottu mennyh, kačos jo, yli kuuzikymmen
Tallel ollah hurstit net, levitämmö kylmäl.
