Texts
Return to list
| edit | delete | Create a new
| history
| Statistics
| ? Help
Mechine (Starin)
Mechine (Starin)
Veps
New written Veps
Iknan taga paneb lunt.
Se hilläšti kehkerdab il’mas i laskese maha.
Penikaine neičukaine ištub iknanno i kacub kuvid, miččid pakaine pirdi stöklal.
Penes kodikahas honuses palab lamp.
Päčiš hilläs räzaidaba haugod.
Baboi ištub päčinno, kudob alaižid i harvašti kacub vunukaha.
Naku vunukoine tuli baboinnoks i pakiči:
– Baboi, starinoiče sarn!
I baboi hilläl änel zavodi starinoita.
Nece oli amu.
Eliba-oliba ühtes küläs uk da ak.
Oli heil Mašoi-vunukaine.
Eliba hö hüvin.
Kerdan uk sädihe mända mecha haugoihe: pani päle tulupan, kohetud villakod jaugha, kulun šapkan pähä, oti kirvhen da noran i läksi mecha.
Tobjimalaz kaik mecan eläjad tal’vel magadaba.
A naku ozatomuz tuli.
Mechine nikut ei voind putta ičeze pert’he.
Tuho uhoiči kaikid kandoid, kut naku löuta pertid.
Astub Mechine mecadme i kuleb: ken-se kolkotab.
Kacub Mechine, a nece uk čapab haugoid.
Radospäi hänele räk tegihe i hän heiti tulupan.
A Mechine ei meletand hätken – ličihe tulupan kormanaha.
Pördihe uk mecaspäi kodihe, a Mechine läksi kormanaspäi i peitihe päčin taga.
Tuli eht.
Kaik kodihižed panihe magadamha.
A Mechine lämbitelihe päčin taga da zavodi hoguda.
Baboi kulišti judun, pöl’gästui i zavodi noustatada ukod.
Kuni noustati ukod, Mechine tüništui i uinzi.
Öl Mechine libui, mäni päčin tagapäi i zavodi rouhida suhrid.
Vunuk kulišti, libui magaduzsijalpäi i homaičemata tuli Mechižennoks.
– Ken sinä oled?
– Olen Mechine.
– Oled-ik kodi-ižand?
– ei el’gendand Mašoi.
– Ka ei, minä olen Mechine, – abittui Mechine i läksi päčin taga.
Homendesel vunuk starinoiči kaikes ičeze baboile.
Baboi lujas ihastui – lopuks heiden-ki pertiš om kodi-ižand.
Zavodi sötta händast.
A Mechine iče-ki om harjenu elämaha ristituidenke – zavodi ukonke mecha kävelta, kaiči pertid.
A kut keväz’ tuli, zavodi Mechine tusttuda mecad, ičeze pertid.
A sil aigal emäg ižandanke, kudambad eliba susedpertiš, läksiba elämaha lidnaha i jätiba pertin.
I jäi kodi-ižand üksnäze.
Lujas tusttui hän ičeze emägad da ižandad.
Mechine zavodi pagištoitta kodi-ižandad lähtta lidnaha ičeze emägannoks da ižandannoks.
Ezmäi kodiižand ei hökkähtand, a jäl’ges mäni elämaha lidnaha.
A Mechine oli opalas, hänele oli jüged erigata kodihižidenke, ka nimidä ei sa tehta: mec kucui i maniti händast ičezennoks.
Konz päiväine zavodi lämbitada mad, Mechine pördihe mecha, no ičeze kodihižid nikonz ei unohtand – se ozutab marjžomad, se iče babukoid tob...
Muga hö eliba-ki.
Baboi kacuhti ičeze vunukaha, a hän jo nukkub.
A lunt kaiken paneb i paneb i se hilläšti laskese maha.