Texts
Return to list | edit | delete | Create a new | history | Statistics | ? Help
Pedrvaza
Pedrvaza
Veps
New written Veps
Hoštai
päiväine lämbiti pardesižen pertižen katusen , mitte seižui keskel pen’t pallištod .Ümbri pallištos kazvoiba nored pedajad .Kaik , mi oli kattud lumudel , hošti päiväižel .”Kidž-kidž ” – kului , i pedaižomaspäi hihti uk kodiš tehtud levedoil suksil . Nece oli Jehim-mecnik : hän azotihe , sikš ku hoštai päiväižel lumi kuti sogenzoiti händast .Hänen koir , kudamb joksi hänen jäl’ghe , veslas nutaškanzi i joksi edel ižandad pertižennoks .
Hihtäjan päs oli pehmed ombeltud reboin nahkaspäi šapuk .Toine šapkan korv oli kinktas sidotud šapkaha , a toine ripui kuti koiran korv .Konz Jehim sirdi šapkan tagarajale , nägui päivitadud kulmihesai mod da vauged harv bardaine .
”Sadus vai linmal joksenzi koir ...” – Jehim pajati , i muhahti bardaha .
Jehiman änele joksi koumekuine kužu , nutoizi kaks’ kerdad , joksi tagaze i peitihe pordhiden alle .
”Händan lendi , hajuzi – kaik midä voi tehta ”, – lopi Jehim pajon .
Hän heiti suksed i pani ned pertid vast .Miše puhtastada kangad lumespäi , kolahtoiti jaugal da toižel seinäha , sid’ oti kadagvastan , pühki lumen kangoilpäi , avaiži verajan da heikahti .
– Nastoihut , nece minä olen , Jehim . Oh , mitte sä om tämbei ...Nägub , miše pigai tuleb keza .Om jo läm’ .Kut sinä minuta tägä olid ?Hän ei varastand , kuni hänele anttas vastust , haškahti pertihe .
Pertiš seižui magaduzsija , a sen päl ripui pen’ jumalaine .Jehim riputi fufaikan varnaha , heiti kangad jaugaspäi i sanui möst :
– Nastoihut , a Nastoihut , midä vaitti oled ?Ala pöl’gästoita mindai .Vastha , kusse päčin taga , mi-se kubaidaškanzi i kului ”mö-mö-mö ”.– Oled hengiš , ka om čoma-ki . I-ka , minä , urad , jo midä vaiše en meletand , – ihastui Jehim .Sid’ hän haškahti samvarannoks i pani sihe truban .A jäl’ges sanui möst : – Sinei oliži hüvä olda pedaižomas , pigai läžund lopižihe-ki .Ka en voi vedä sindai sinna , ei ole väged .
Jehim pani zel’l’heinid da jurid astijaha , valoi sihe hulad vet i saupsi ruzul .Pertiš mujuškanzi heiniden hajul .Päčin taga möst ken-se šobaidaškanzi , hengiškanzi .
– Tirpa , tirpa vähäine , izo , – pakiči Jehim i mäni ruzukogonnoks , mitte oli päčin taga . Ruzukogospäi oigenzi hänennoks kärzaižen nor’ suriden sil’midenke da pit’kiden ripsuidenke pedrvaza .Vanhan ukon käzi silitoizi pedrvazad pädme , i se kubahti ladides libuda , sirdeleškanzi kabjoil .
– Kuna , kuna sinä , Nastoihut , rigehtid ? Kac , kut vac-se om rebitadud .Libud , ka kaik kiškad-ki lankteba südäimespäi .
Pedrvaza nolouzi Jehiman kät .
Madalan iknan irdpolespäi ozutihe koiran kärz .Se libui übusele , mitte oli iknad vast i činktes kacui stöklan tagapäi .
– Ruzav , tüništu , ika murendad stöklan . Kac , mitte om valdaline , ei kundelte nikut .Ole vaitti !– Jehim iški nürkul lavadme . Pedrvaza säraidaškanzi .
– Nastoihut , ala varaida , nece minä iškin , miše Ruzav kundliži mindai . Ika uradiškandeb , ei anda sanuda vajehtki .
– Jehim libui kombuilpäi , mäni otmaha heinlent da völ oti stolalpäi bankaižen , miččespäi hajusti surel da pahal živatal . Ded avaiži bankaižen i haju päzui kaiked pertidme .Pedrvaza vedouzi nenasäl’gmil , i haju kuti täuti kaiken hibjan .Pedrvaza saupsi varuspäi sil’mäd .
– Midä sinä , izo pedraine , ala varaida . Nece ei ole kondi , nece om vaiše sen razv !– Jehim vedouzi Nastoihuden nenasäl’gmiš i se avaiži sil’mäd . Nu , midä , eläbzduid ?!
Jehim oti bankaspäi voižet i voidaškanzi čapatesen vacal , a iče pagiži :
– Minä rikoin kondjan ani kanman Iljan päiväd .Lihan andoin heimolaižile , a ičelain sulazin razvad .Kac , kut om : kondid jo ei ole amu hengiš , a razv om zel’l’an sijas .Konz voidad jodal , vaiše pakutab i čapatesen röunad muga jäba-ki , a konz voidad razval – pakutab , pakutab da čapatez sauptase da muga , miše ed homaiče-ki , miše se oli konz-se .Mindai viž vot tagaze kondi peksi , ka minä hänen razval spravimoi-ki .Küläs sanutihe , miše Jehim ei ole eläi , – uk vaikastui vähäižeks , nacein , muštli , midä oli viž vot tagaze , a nügüd’ kacu , käzi om kuti uzikoine .
Jehim kaiken sanui da sanui , miše pedrvaza unohtaiži kibun polhe , a iče voidi hajukahal razval čapatesen .Sid’ pani čapatesele marl’ad da kingiti sidä plastiril .Kosketi sormel – om-ik viluganu heinlem’ i sirdi astjan hahkan kärzaižennoks .Nastoihut lipsaiži kerdan , vaiše ei joškand enamb .Siloi Jehim tabazi kärzan da vedouzi ičezennoks i valoi suhu vähäižen .Konz živat lainzi , uk valoi möst .Konz kaik oli jodud , Jehim sanui :
– Ho , mitte oled , čoma neičukaine !Öl jotan völ kerdan .A homendesel joksenden ezmäižele lüpsandale , täs rindal , pedaižomas päliči om živattannaz .Jotan lämäl maidol .Da mänen völ Glašannoks , otan heinäižid .Nu , magada , magada !Uni om parahim zel’l’ .– Jehim siliti Nastoihut lühüdadme karvaštme .
Päiväine jo laskihe .Ruzav hüppi iknan taga , nutoizi i mäni pordhiden alle ičeze kužunnoks .Jehim andoi söda koirile-ki .
Öl , venudes palatil , Jehim kacui , kut kudmaine läksi mecan tagapäi i ujui taivhastme , kacuhti magadajan pertižen iknaha .Laval , ruzuiden al šobaiži Nastoihut .Jehim , venudes sel’gäl , burboti laskvas än’heze , kuti pajati kättepajon pedrvazale :
– Uinda-magada , Nastoihut .Kaik linneb hüvin .Eläd minunno , tegem sarajan ...Ala käregande ristituiden päle ...hö oma erazvuiččed – oma hüväd , oma hubad-ki ...Tervned , varu lopiše , pästan sindai valdale ...Kaik linneb kut tarbiž ...Uinda-magada , Nastoihut .
Necil öl kudmaine kacui hätken pertižen iknaha – nacein tahtoi tedištada , mil erineba hüväd ristitud hubišpäi .A voib olda , vaiše žalleiči ranitud pedrvazad .Ken sidä tedab , kudmašt-se ...
Pedrvaza
Veps
New written Veps
–
–
–
–