Texts

Return to list | edit | delete | history | ? Help

Mitte voib olda tal’v?

Corpus: New-writing language

New written Veps, Literary texts

Source: Mihail Pl’ackovskii. Vepsäks kändi Maria Mironova, Kodima. № 2, (2018), p. 8

Mitte voib olda tal’v?
(Vepsian)

Kerdan küzutihe slonal:
Mitte voib olda tal’v?

A mi nece om tal’v? čududelihe slon.
Küzutihe kerdan pohjoižel pedral:
Voib olda, sinä andad vastust, mitte voib olda tal’v?

Tal’v voib olda lujas pit’k, – sanui pedr. Se minun kodimal jatkub kogonaižen voden. A konz voz’ lopiše, tal’v zavodiše udes.
Küzutihe kerdan vilulindal:
A sinä midä meletad, mitte voib olda tal’v?

Tal’v voib olda jüged, – sanui vastha vilulind. Om hüvä, ku ristitud ei unohtagoi antta linduile leibmuruid. A ku unohtadas, kuspäi niid otta?
Küzutihe kerdan koiral:
Nacein, sinä tedad, mitte voib olda tal’v?

Br-r-r! Se om vilu! Sid’-žo nutaškanzi koir. Om hüvä völ, ku om koda! Sigä voib lämbiteldas.
Küzutihe kerdan kondjal:
A kut sinä meletad, värlap?
Mitte voib olda tal’v?
A midä sen polhe pagišta-se? rävkni kondi. Ved’ tal’v om lühüdjatkub vaiše ühten ön! Uindad pezas tal’vel, a heraštudirdal om jo keväz’.
Küzutihe kerdan prihažel:
Nu-ške, sanu sinä: mitte voib olda tal’v?

Tal’v om ilokaz! heikahti prihaine. Tal’vel lapsed huzaidaba reguzil, štarguil, hihtäba suksil, tegeba lumiukoid. A völvändaba lumižil!
Naku mitte voib olda tal’v!