Texts
Return to list | edit | delete | Create a new | history | Statistics | ? Help
Mourfii
Mourfii
Livvi
New written Livvic
I
oza
Jo ammui älykkähät rahvas huomattih , ku oza on kui tervehys : konzu olet terveh , sidä et huomua .Ga vuozien mendyy – kui rubiet mustelemah ozua , kui lujah mustelet !
Midä koskou minuu , minä , kui rodih selgei vaigu nygöi , olin ozakkahannu talvel vuvvennu 1917.Unohtumatoi , tuhožu , ruttoh mennyh vuozi !
Algavunnuh tuhu tembai minuu , kui revinnyön lehten palan da siirdyi hil’l’azes muapalazespäi muakunnan linnah .Ongo suuri dielo – muakunnan linnu , duumaičet sinä ?Ga ku kentahto minunmoine , eli lumes talvel , köyhis mečis kezäl puolentostu vuvven aigua , ni yhtekse päiväkse ei jättänyh omua taloidu , ku kentahto revitti mennyön nedälin lehtel banderoulii hengähtysty peitellen , kui ozakas mieldynyh mies revittäy valpahansinisty konvertua , ku kentahto ajeli 18 virstan matkah lapsensuajalluo jonolleh val’l’astetul riel , tai ristikanzu , duumaičen , ellendäs minuu .
Aiga mielužu vehkeh on karasinlampu , ga olen sähkön puoles !
Ga vot minä näin niidy uvvessah , nämmii muanittajii sähkölampoi !Linnan piäuuličču , kuduadu hyvin ajelutettih muanruadajien riet .Uuličču , kuduadu myöte ihastuttajen riputtih laudu piirustettuloin suappualoinke , kuldaine kringeli , ruskiet flavut , nuoren brihan kuva , kudual oldih počinsilmät da ihan ebäluonnolline pričosku , se merkičči , ku st’okluveriän tagan ruadau paikalline Bazil’ .Tai Bazil’ , kudai kolmelkymmenel kopeikal breiččou sinuu konzu tahtot , paiči pruazniekkupäivii , kudualoi on ylen äijy minun kodimual .
Tässäh särizen mustelles Bazil’an salfietkoi .Salfietkoi , kuduat pakoitettih kuvittelemah germuanilazen hibjutartumutaudiloin opastuskniigan sidä sivuu , kudual oli ihan selgieh kuvattu kova siifilisubul’ku mittumanlienne mužikan levval .
Ga yksikai nämmä salfietkat ei voija rikkuo minun mustelmii !
Tiešuaral seizoi tovelline militsiimies , a pölyhizis ozutusikkunois nävyttih raudulehtet , kudualoil oli magieloi piiraihuzii ruskiedu kannatesvuahtie piäl .Lagevo oli katettu heinäl , rahvas astuttih da ajeltih da paistih , laukas myödih egläzii moskovalazii lehtii , kudamis oli uskomattomii uudizii .Ei loitos kuččujen viheldettih toine toizele moskovalazet junat .Yhtel sanal tämä oli sivilizatsii , Vavilonu , Nevskii prospektu .
Ei pie paista ni bol’niččua .Täs oli hirurgii -, terapii -, tartumutaudi - da lapsensuandulaitos .Bol’ničas oli leikkavuszualu , kuduas loškotti avtokluavu da hobjazet kruanat , stolat avattih omat mutkikkahat käbälät , piit , vintat .Bol’ničas oli piäliäkäri , kolme ordinuattorua (minun ližäkse ), moni akušerua da bol’niččuhoidajua , aptiekku da laboratourii .Toko vai toko , laboratourii !Täs oli Zeissan mikroskouppu da hyvä kruaskuvara .
Minä kapsahtelimmos da minule toiči rodih vilu , minuu painettih vaikutukset .Meni äijy päiviä kuni minä en harjavunnuh sih , ku talvikuun hämärilöin aigua buite käskyl yksikerroksizis bol’niččulaitoksis sytyttih sähkötulel .
Se sovendi minuu .Vannois bauhui da lökötti vezi , niilöis čukeldettihes da uijeltih ligahizet puuhizet gruadusniekat .Lapsien tartumutaudilaitokses kogo päivän kuului voivotustu da öikehty , hieno abei itku , korizii bul’keh ...
Bol’niččuhoidajat juoksendeltih , šn’avettih ...
Minä piäzin jygies takas .Minule nämbiä ei olluh fatuallistu vastustu kaikes , midä vai ei tapahtunnus muailmas .Minä en olluh viäry näpistetys kilas da en kipsahtelluhes , konzu tuldih riet da tuodih kohtuine inehmine , kudual vačas lapsi oli poikkizin .Minuu ei koskiettu enämbiä märgyplevritat ...Enzikerran minä tunzin iččiedäni moizennu ristikanzannu , kuduan vastus on rajoitettu mittuzillienne ramkoil .Lapsensuandu ?– ole hyvä , tua on madal rakendus , tua ikkun , kuduas zuavessiloin sijas ollah valgiet marl’at . Sie ruadau hyvännägöine da sangei , plieššipiä akušeruliäkäri , kudual ollah ruskiet usat .Tämä on hänen huoli .Regi , kiändäi marl’al riputettuh ikkunah päi .Vaigei katkelmus – piähirurgalluo .Kouhkoloin žuaru – terapiilaitokseh Pavel Vladimirovičalluo .
Nimidä parembua ei ole migu suuren bol’ničan koneh , kudai toimiu kui voijettu !Kui ennepäi valmistetun mallin mugah luajittu uuzi vintu , minä piäzin koneheh da otin omah vastuoh lapsien laitoksen .Keroimärgy da skarlatiinu temmattih minuu , otettih iäres minun päivät .Ga vaigu päivät .Yölöil minä magain hil’l’ah : minun ikkunoin al ei kuulunuh enämbiä veriäh varaittavua kolahtustu keskel yödy , mi voinnus nostattua da vediä minuu pimevyös kohti varavoh da vältämättömyöh .Ehtil rubein lugemah : enzimäi , tiettäväine , keroimärgäh da skarlatiinah nähte , a sit mene tiijä mindäh minuu ylen äijäl miellytettih Fenimore Cooperan tevokset .Sil aigua rubein arvostamah lampua stolal , harmualoi hiilipalazii samvuaran podnosal da čuajuu , da unettoman puolentostu vuvven jälles unet ...
Moine olin ozakas talvel vuvvennu 1917, konzu minuu siirrettih muakunnan linnah hil’l’azes tuhožas muapalazespäi .
Mourfii
Livvi
New written Livvic