Texts
Return to list | edit | delete | Create a new | history | Statistics | ? Help
Ivan Kudel’nikov. Ole luja, ristikanzu
Ivan Kudel’nikov
Ole luja, ristikanzu
Livvi
New written Livvic
Kui
suarnois sanotah : ylen ammui , enne muinai , konzu oli jo mua azuttu i tuli aigu ristikanzua luadie , Jumal oli äijäl väzynyh , ei olluh vägie duumaija , otti dai vualii hänen kaikeči iččeh pohodijakse i lähti korgiele , kaikis korgevimale Gimalaji-mäile huogavumah muailman ruadolois .
Meni vuozi , meni toine , meni kymmene vuottu .Jumalal oli himo heittyö muale kaččomah , kui ristikanzu eläy , midä ruadau , jättäygo midägi lapsile da bunukoile , da mieli tuli piäh : ei vie häi yksinäh ehtinyh nimidä mostu azuo , pidäy vuottua vie kodvaine , anna lapset kazvetah da abuniekat suuretah , anna vägevyy rahvahan rodu , da opastuu mies suurii kodiloi salvamah , lageiloi peldoloi kyndämäh , pitkii juamoi luadimah .
Moizii duumii duumaijes äijy rahvahan igiä kului muailmal .
Kerävyi taki Jumal muale heittymäh .Oli kevät .Päiväine čirittäy taivahas , lehtet puulois lepetetäh , linduzet pajatetah .Nägöy Jumal levien juaman :
– Eläy ristikanzu !
Terväh tuli vastah ruispeldo .Pellon peräl vahnu mies aidua pystyttäy , da žirdit sidou rugehel .Hänen hengi hykähtih : miksebo mies moizen hudrun aijan pystäy pellos ymbäri ?
Meni miehen rinnale , sanou :
– Hudrakse häi sinä aijan azuit .Hätkengo se kestäy ?Hevot ved’ terväh vičat syvväh ?
Vastuau mies :
– Minä huomei kuolen .Roih minun ijäkse .
Menöy Jumal ielleh .Tulou vastah suuri järvi .Järven rannal kahtei nuottua vietäh .Kaččou .Viettih nuottu randah : suuret kalat otetah , pienet nurmele lykitäh .Suutui Jumal : – Miksebo , miehet , pienet kalat lykkiättö kuivale muale kuolemah ?Ei teile nenga hätkekse kalua järves tävvy .
Vastatah hänele kalastajat :
– Myö kuolemmo vuvven peräs , meijän ijäkse täydyy .
Odva lekkuu ielleh Jumal , onhäi gu jallat katkai .Kodvazen peräs hieru tuli vastah .Nägöy : nuori mies kodii zavodiu salvua .Äijän lujua partu varusti .Panou pohjuparziloi da heittäy niidy muan piäle .Myös Jumalan syväin säbjähtih : ved’ puu pehmies muas da vie märräs kohtas terväh happanou .Kyzyy Jumal miehel :
– Miksebo , ristikanzu , et pane alusparzien alle lujenduksekse hos kivie ?Onhäi pellol niidy nenga äijy , adran vedäjes ved’ tiel ollah .Kivettäh sinun uuzi kodi rubieu muah heittymäh .
Vastuau mies :
– Minä kymmenen vuvven mendyy kuolen , minun ijän kestäy .
Pahelzui Jumal : annoin ristikanzale pitkän ijän : ičelleh opastuo , nerot lapsile nevvuo da vie lapsienlapsii äbäzöijä .Häi vai omii igii lugou da varuau liijan askelen astuo .
Taba nosti hänen myös Gimalaji-mäile : silmät ei enämbiä nähtäs nengostu ristikanzan elaigua .Ristikanzu ei jätä nimidä ičen jälles muale , eigo lapsile , eigo bunukoile .
Meni vuozi , meni toine , meni kymmene vuottu .Tuli Jumalale piäh mieli : ristikanzal ei nimikse pie tiediä sidä aigua , konzu häi kuolou !
Muga i azui da i vieri ielleh huogavumah .
Meni vuozi , meni toine , meni kymmeniine vuottu .Lähti Jumal muadu myö kävelemäh rahvahan elaigua kaččomah .Astuu leviedy juamua myöte , nägöy vahnu mies aidua pystäy , žirdit sidou pihl’aivičal , aidua pystäy pitkäkse aigua .Jumal tiedäy hänen kuolendan huomei i hyväs mieles kirgai :
– Juamal abuh !dai astuu ielleh .
Vagavazesti vastai mies :
– Pidäy abuo !Ei ole aigua äijiä paista , kevät on kuivu , terväh mua kuivau , en ehti loppie .
Kebjiesti jallat viettih Jumalua juamua myöte .
Tulou vastah suuri järvi .Nägöy Jumal kahtei nuottua vietäh .Suuret kalat komšah pannah , pienet järveh työtäh .Azui Jumal tervehyön heile , pehmeni hänen syväin , segu häi tiezi mužikoin kuolendan vuvven peräs .
Astuu ielleh hyväs mieles .
Ei ni huoles olluh , kui mečän tagan avavui suuri hieru .Čomat koit seizotah kohti , rahvas päčit lämmitetäh , ku savuu nouzou levoloin piäle .
– Ole luja , ristikanzu !
Ellendi Jumal , mis on viga , i ei enämbiä ristikanzu tiijä , konzu elos hänen loppuu .Iče vie nygöigi huogavuu Gimalaji-mäil , vai liennöy iäres mennyh Kalevalan kangahile kävelemäh .
Ole luja, ristikanzu
Livvi
New written Livvic
–
–
–
–
–
–
–
–