Texts
Return to list | edit | delete | Create a new | history | Statistics | ? Help
Olgišliäppy piäs Elokuu
Olgišliäppy piäs Elokuu
Livvi
New written Livvic
Terväh
aigu huškai , vesselän da kirkahan Heinykuun sijah tuli bohattu Elokuu .Elokuu tulou nenäh enzimäzile juablokoile , valpahanruskieloin tomuatoin magevuole , mehevän križovniekan da čihoin kypsyöle , muarjat net suletah huulil .
Suuri olgišliäppy piäs , paidu kodazil da kirjavat šortat piäl Elokuu ruadau huogavumattah , selgiä oijendamattah .Elokuu on bohattu kukil , net ilaškoitetah meidy eri värilöil da duuhuloil .Elokuu tarkah kaččou joga vihandan lehtyön uale ogurčoi keriäjes – eigo peittynyh viizahaine “kodazeh ”:
– Midäbo sidä čökität omil niegloil , raukku ?Yksikai otan da bankah peitän !Älä hypi , vihandu !
Täs on tomuatoin muat !Ruskiet , keldazet , oranževoit , rouzankarvazet virutah , riputah , lämmitetäh omii bokkii Elokuun päiväzel .Kui hyvä on koskie siliedy da viiliedy tomuatan kuordu .Mittuine magei on vaste otettu da kiirehes paidah pyhkitty tomuattu !Jatkammo kerätä …Yksi poimičču on täyzi , otammo toizen .Elokuu on ylen hyvä abuniekku !Emmo ni huomannuh , kui toinegi poimičču oli jo “mäinke ”.Nygöi voibi huogavuo kodvaine da syvvä mehevy juablokku , kaččokkua , kui muheloittau se meile puuspäi .Kiškoimmo sen , pyhkimmö …ma-agei .Olgah sendäh , ku käit ollah ligahizet nygöi !Astummo edehpäi kačelles meijän Talmukäin rikkahuksii .Midäbo täs ?Ga täs ollah kabačkat , peityttih lehtien uale , virutah rounoku zontiekoin ual lämmäl mual , nukutah da täytytäh päiväzen lämmiä .Ielleh astujes näemmö duuhukkahan ukropan , a morkouhku levitti oman pehmikkäzen palmikon da kaččou omah susiedah sv’oklah , öhkäy vavos suurimaha kapustu …
Terväh tulou hämäri .Elokuun ehty on kummalline .Elokuu ottau omis lippahis mielužan hojakkusiän , levittäy udupeittien , lykkiäy kirkahimii tiähtilöi sinizel šulkul da vierettäy täytty kuudamastu .Aiga čoma on !Kustahto heinis čirku čirizöy , unimieles paistah keskenäh linnut , odva kuuluu koirien haukundua …Yö …Vagolois magiesti muatah tomuatat , kabačkat , vihandazet ogurčat , kaikin nähtäh unis päiväzen valgiedu , selderei huavelou unis hil’l’astu tuuldu .Hyviä yödy !Huomei rodieu uuzi päivy da uuttu parastu hommua .
Olgišliäppy piäs Elokuu
Livvi
New written Livvic
–