Texts
Return to list | edit | delete | Create a new | history | Statistics | ? Help
Priäžäh jauhoh
Priäžäh jauhoh
Livvi
New written Livvic
Meijän
Karjala ei ole liijakse suuri .Ga emmo nygöi tädä pienevytty pahoittelemah rubie .Muashäi ollah pienelgi jallat .Yksikai joga čupul , joga pienes hieruzes on elänyh mostu miekoidu , kudamien ruavot da käytös ei olla unohtuttu kyläläzien mieles .Konzu ristittyöt niidy mustellah , heil mieli kohenou , ylenöy .A sanottu on jo enne meidy : hyvä mieli ruavon ruadau , paha – kaksi katkuau .
Oli enne Vieljärven puolel mečän sydämes yksinäine taloi – Hökikse sanottih – kaksi virstua N’akoilammis Kukkarvehpäi .Ei jo niilöi virstoi niken miäräillyh , muga silmänmital arbailtih .Taloidu pidi Hökin Puavil Mat’oi-mučoin kel .Ylen oldih hyö mollei ruadamah rohkiet .Tuldih kerran hyö kirvehien da kassariloin kel umbimeččäh .Puhtastettih mäin rindiel muatilkuine pertin da huonuksien tilakse .Kodikuluine pystyh pandih – n’akoilambilazet autettih palkata .En sano passibuo – riähkih kaduon .Puavil-veikoi passibon sanuo maltoi eigo unohtannuh , a Mat’oi-čidžoi auttajil jalgah kumardelih hyvis mielis .
Perti oli .Leibiä pidi suaha .Leibyhäi se on , mi miehen dai akan pystys pidäy .Ruaduo gu kačo Puavil Mat’oin kel ei varattu , ei ni leiby kiven tuakse jiännyh .Hyö kasket kuattih , vierettih , palot kynnettih da kylvettih .Jo oli heil omat ruis -, kagruhalmehet , nagristu kazvatettih sovakse .Ethäi sovata elä .
Vil’l’u kazvoi konzu kui .Joga vuottu ei täydynyh uudizessah omua vil’l’ua da suurustu .
Erähänny kezän vähästy enne leikkavoargie Mat’oi huondeksel aittah pyörältih huttujauhuo tuomah .Puurnuh vaivaine kačahtih – puurnun pohju pastattau .Jauhot loppiettihes .Mat’oi-rukku vezi silmis pertih .
– Pölyygo meni silmih , Puavil kyzyi akal kyynälien nähtyy .
– Jauhot lopi-i-h , pačkahtih Mat’oi täydeh itkuh . – Hututa jäimmö tänäpäi .
– Segoi on paginua , Puavil vastah . – Annas kisa tänne . Huttuvezi pane hedi tulel .
– Ole tolkus , et huttuu jauhota keitä . Vezi ehtiy vie kiehuo , kuni sinä jauhoh kävyt .
– Roih sinul jauhuo , pane vetty kattilah , sanon . Kuni vezi kiehastuu sil aigua Priäžäh pyöräldämmös .Jauhot tuon .
Mat’oi tiezi dai tunzi Puavilan ruton tavan .Tostu kerdua ei ruohtinuh vastah sanuo .Rubei vaikkaine tulehmuo kohendamah .
Puavil sil paginal lähti rapsahtih nahkaine kisa olgupiäl Priäžäh .A Hökispäi Priäžäh oli tyhjän piäl 50 virstua yhteh piäh .Puavilan hebo oli tiineh , kannandua vaste .Hänel jallai pidi tämä matku lipata .Ga terveh da ripsakko mies vambo nengomii matkoi varoi .Kusgo juosta koppahutti , vastumägeh hil’l’embäzeh hyčytti …
A sidä ei niken musta eigo malta sanuo , äijängo kerdua Mat’oi-čidžoi vetty kattilah ližäi kuni Puavil Priäžäh pyöräldelih .Jauhuo Puavil-veikoi toi , uudizessah hyö piästih da sen jälles vie kodvu sulas sovus elettih .Mat’oičidžoi kagrukokkoidu da ruisrieskua pastoi , huttuu keitti , kaikelleh Puavil - veikoidu , putin miesty , akkiloičči .
Ollougo nygöi Puavilveikoi kirmevytty miesty Vieljärven puolel ?Ken hos kerran olis päiväčelleh Priäžäh jallai kapsahutannuh .
Hoi , vieljärveläzet , ongo ?
Priäžäh jauhoh
Livvi
New written Livvic