Texts
Return to review | Return to list
Nügüdläižed formatad udes mediakeskuses
history
October 16, 2021 in 17:26 Nataly Krizhanovsky
- changed the author of the source
from Galina Baburova
to
September 17, 2019 in 22:55 Нина Шибанова
- created the text
- created the text: Sügüz’kus ”Periodika”- paindištos avaitihe mediakeskuz, miččes pagištihe äjan da mittušt lujas varastiba ristitud, kudambil om melentartuz’ karjalan, vepsän da suomen kelihe da kul’turaha. Ezmäižiš päivišpäi udes mediakeskuses kehuškanzi rad. Sigä mäniba erazvuiččed ištundad da mastar’-klassad, seminarad da suimad. Kül’mku mugažo zavodihe erazvuiččiš azjtegoišpäi, miččed mäniba neciš čomas sijas. Üks’ niišpäi om ”Melekaz pätnič”-projekt, mitte eläb Petroskoiš jo erasid vozid. Sihe tuleba lekcijoiden ezitajad erazvuiččiš radpolišpäi da starinoičeba midä-se melentartušt. Kaikuččele lekcijale anttas 20 minutad. Kundlijaks voib tehtas kaikutte tahtnik. Lekcijan jäl’ghe kundlijad voiba tehta ičeze küzundoid lekcijoiden lugijoile. Projektan emäg om tetab Karjalas lehtmez’ Natalja Jermolina. Mugoine ”Melekaz pätnič” mäni täl kerdal ”Periodikan” mediakeskuses. Sille anttihe tem – ”Karjalan igähižed rahvahad”. Vastusen lektoroin oliba ”Periodikan” pämez’ Natalja Sinickaja, paindišton radnikad – Armas Mašin, Margarita Kemppainen da Rahvahaližen muzejan radnik Tatjana Berdaševa i ”Kiži”-muzejan radnikad Natalja da Jevgenii Mihailovad. Kundelmaha lekcijoid tuli äi rahvast. Mugažo lekcijoid voi kundelta onlinerežimas Internetan kal’t. Ezmäižen lekcijan ningoižel mahtol kacui 1400 mest. Lugi sen Natalja Sinickaja. Hän starinoiči siš, kut kändi kirjoid Mumi-trolliš da melentartuižid azjoid Tuve Janssonan elospäi. Kut kirjutai armasti ičeze kirjoiden hengid, kut ned sünduiba hänen meles, kenel heišpäi oliba prototipad todesižes elos. ”Tuve Jansson openzi mindai mugoižehe kebnaha azjaha – sada ihastust kaikuččel minutal, azjoiš, miččed oma ümbri meiš. Nece om muga kebn – olda ozakahan. I nece om tozi!” – lopi ičeze ezitusen Natalja. Tatjana Berdaševa starinoiči suomalaižes fotokuvadajas Inha-nimel, kudamb ajoi Belomorskan Karjalaha da tegi sigä lujas čomid kuvid. Armas Mašin – Venäman suomalaižiš da heiden panendas Karjalan parembzoitusehe. Margarita Kemppainen starinoiči da ozuti, kut karjalaižed paniba pähä paikoid, kut voib nügüd’ čomin kävutada paikoid ičeze garderobas. A Natalja da Jevgenii Mihailovad jagoihe kundlijoidenke kantele-vändimen peitusil. ”Melekaz pätnič” oli lujas melentartuine, se tuli ristituile mel’he. Projekt om lujas popul’arine nügüd’ Karjalas norišton keskes. ”Projektan idei om ottud verhas maspäi, lekcijoiš mugoižes formatas tetas kogonaižes mirus”, – sanui Natalja Jermolina. Necen pätničan tahtnikad voiba ostta ”Periodikan” painusid da mujada karjalaižid tradicionaližid sömižid, miččid kahtes časus edel ”Melekast pätničad” tegiba mastar’- klassan ütnikad. Tal’vkus mediakeskuses mäneb vepsläižen-ki sömižen vaumičendan mastar’-klass. Rigehtigat kirjutadas, ühtnikoiden lugumär om märitud.