Texts
Return to list | edit | delete | Create a new | history | Statistics | ? Help
Goštikoi
Goštikoi
Livvi
New written Livvic
Lehmiä
kirruttih : “Goštikoi !Goštikoi !”Se kuuli oman nimen , kiändi piän da andoi iänen : “Myö !Myö !”
Se pidi ellendiä muga : “Myö jo tulemmo , vastakkua meidy , olgua valmehet lypsämäh !”
Goštikoin maijonjuojua oli äijy : oma lähtemy , počči , kaži da vie taloin ristikanzat , nuoret dai vahnat .
Midä vai ei valmistettu maijos !Vaste lypsettyy juodih , veresty maiduo havvuttih .Se havvutettu maido oli hyvä čuajun kel .Hapaimaidoloi särvettih dai juodih , dai päččih pandih .Päčis se kiärdyi ruahtokse .Ruahto oli paras syömine lapsil .Zuaharin kel se oli magei , a gu vie kannatestu ližiät – sit astiet nuolet , moine se on syömine .
Maijon kel syödäväkse koin emändät pastettih piiraidu : pyöräidy , sul’činua , val’l’oidu …Iče lehmy omal nimel buiteku murizi : “Kuččukkua gostii da gostitakkua minun maidoloil .”
Hyvät ižändät oldih Goštikoil : se ei kuulluh pahua sanua , ei tiedänyh humal’niekkua , eigo riidua , eigo hoppuu : jogahine vai ruadoi da ruadoi .Hyvin syötettih , hyvin juotettih , midäbo vie pidäy ?
Goštikoigi ei olluh vellas : andoi maiduo hyviä , razvastu .
Emändät suitettih kannatestu , sit pieksettih niilöis voidu .Tädä ruaduo puaksumbi ruadoi vahnu emändy .Häi ottau suitetut kannatekset da rubieu pieksämäh voidu , a pienet bunukkazet ruvetah jo leibiä varustamah .
Vahnembaine Anni kyzyy Nast’ua :
– Mittuine viiboi sinulles pidäy leikata : kahtel käil kannettavu vai yhtel ?
Nast’aine ihastuksis pl’aššiu :
– Kahtel , kahtel !
Sit häi nägöy , sizär leikkai ylen hoikkazen palazen .Pieni Nast’a ei voi ellendiä , mindäh nengozen hoikkazen viibalozen hänelleh leikattih ?
Anni rubieu sellittämäh :
– Sinä , Nast’a , iče kačo : hoikkaine viiboi pidäy ottua kahtel käil , yhtel et ota – se katkieu , murenou .
Tyttö ičegi nägöy !
Anni jatkau :
– Nygöi vie kerran kyzyn : kahtel käil kannettavu vai yhtel pidäy leikata ičelleni ?
Nast’a ei malta suuttuo , häi vastuau :
– Leikkua yhtel käil kannettavu .
Anni leikkuau sangien viibalon .Tytöt kačotah da nähtäh : tämä ei murene .Buaballeh voi on jo valmis , se kokottau padazes .Buabah nägöy – leivätgi jo on leikattu , ga yksi viiboi on ylen hoikkaine , kui iče nuorembi bunukkaine , toine pala on sangei , sidä vie voibi leikata kahtekse .Häi ottau veičen , valmistau leivät , voidelou uvvel voil da tariččou lapsile .Tytöt syvväh da kiitetäh :
– Ongo tämä syömine vai ei !
…Ammui se aigu oli . Nygöi , konzu voidu annetah talonoil , juohtuttih mieleh kyläeloksen magiet syömizet .
Kogo ijäkse jäi mustoh Goštikoi .Hyvä , maijokas oli lehmy …Kembo silloi paimendi kylän lehmii ?Paimoin nimi unohtui …Mustan vai kui joga huondestu Goštikoidu karjah työndäjes buabo sanoi :
– Hyvä Jumal !Vardoiče meijän syöttäjiä !
Goštikoi
Livvi
New written Livvic
–
–
–
–
–
–
–