Texts
Return to review | Return to list
Midä vepsläižed tegiba tohespäi
history
October 16, 2021 in 16:04 Nataly Krizhanovsky
- changed the author of the source
from Ol’ga Žukova
to
October 02, 2019 in 12:23 Нина Шибанова
- created the text
- created the text: Vepsän rahvaz igän eläb mecoiden keskes, sikš mehed mahtaba eläda kožmuses mecanke da äjan otta sišpäi elon täht. Ende kodikaluiden tehtes kävutadihe lujas äjan koivun toht. Nece oli mužikoiden rad. Mecas valitihe puhthembad da sanktembad koivud. Tohi ottihe paksumba kezal. Siloi se kebnas lähteb puspäi. Čaptihe veičel i hilläšti ottihe sured palad. Ku tarbiž oli kuvata midä-ni sures tohen palas, siloi sidä levitadihe lavale da pandihe päle jugun. A ku tahtoitihe kuvata puzuine vai kašel’, čaptihe tohi lentoikš i punotadihe keraks. Jäl’ges sišpäi voili kuvata midä taht. Tohespäi tehtihe erazvuiččid astjoid, robehid midä taht pidädes. Puzuižid da burakoid ottihe käveltes mecha marjoihe da sen’he. Kalaha da mectusele käveltihe kašal’ sel’gäs. Miše otta kerdale čunz’uid mändes ongitamha, tehtihe kaks’ pen’t puzušt, i üks’ puzuine mülüi toižehe. Muga ne pidihe, i čunz’ud jäiba henghe, sikš ku voiliba henkta tohesižes puzuižes. Miše otta kerdale sol mecha, kalha vai heinäntegole, tehtihe tohespäi pen’ solmest. Ende jaugha pandihe tohespäi kuvatud virzud i ned kuvatihe kaikile kanznikoile. Hodras pidetihe veič da labidoine vikatehen hijodes. Lapsile tehtihe tohesižid mäčuižid bobaižikš. Vepsläižed paimned tegiba tohespäi torvid, miše torta i muga kerata ühthe lehmid. Torved voiliba olda erazvuiččed surusel: kut pened, muga sured-ki, metran piččed. Fotoiš voib nähta tohesižid tehmusid Piterin agjan Podporožjen rajonan Kurb-külän vepsläižes muzejaspäi.