Texts
Return to review | Return to list
Mušt kaitas igän
history
October 14, 2021 in 19:27 Nataly Krizhanovsky
- changed the author of the source
from Maria Filatova
to
May 25, 2020 in 15:20 Нина Шибанова
- created the text
- created the text: Vägestusen päiv om lujas tärged da sur’ praznik meiden mal. Necil päiväl ozateldas da spasiboitas veteranoid, kaikuččes pertiš mušteltas kanznikoid, kudambad oliba voinal, ihastoittas joudajale mirule. Nece keväz’ toi meile ani tošt mirud da ani tošt Vägestusen päiväd. Ei olend täl vodel sal’utad, ei olend toižid-ki tradicionaližid praznikaližid azjtegoid. No kaikse ristitud napriba tehta praznikan: čomitiba ičeze pertiden iknoid Vägestusen simvoloil, pajatiba gardalejoil ”Vägestusen päiv”- pajod, paniba Internetha ičeze dedoiden da baboiden fotoid, starinoičiba heiden sures tegos. Änižröunan vepsän mal vaumi-štadihe praznikaks aigvodhe. Tägä sureks praznikaks udištadihe vanhoid memorialoid. Nügüd’ Kalages vanhan muštpachan sijale om pandud uz’ sur’ memorial. Se om omištadud kodiman kaičijoile, niile, ked koliba kaites ičeze kodimad. Memorial om viden metran levitte da kahten metran kortte. Siš om kirjutadud enamb kaht sadad voinmehiden familijad. Idei tehta uden memorialan Kalages tuli pähä sijaližele eläjale, ”Karatau-grupp”-cehan pämehele Konstantin Saveljevale. Hän starinoiči: ”Necen idejan völ tal’vel minä starinoičin ezmäi Kalagen administracijan pämehele Natalja Silakovale. Ved’ vanhale muštpachale oli jo enamb 50 vot. I minä meletan, miše nece om meiden velg – kaita muštod voinan polhe. Natalja Jevgenjevna tugezi mindai. Jäl’ges mö sanuim sen polhe minun radišton pämehele Igor’ Mišukovale. Hän mugažo tugezi necidä idejad”. Äjad kivisaskelmižed karjerad da cehad tegiba suren i tärktan azjan. Niiden pämehed tugeziba necidä idejad udištada vanhoid memorialoid i abutiba rahoil. Lopuks oli pättud vajehtada muštpachan Toižeges – sigä oli udištadud saldatoiden kaum, völ panda uden memorialan Kaskezas da tehta uden memorialan Hämähkos – se om omištadud 368. ambuskelend divizijale. Kalagen administracijan pämez’ Natalja Silakova sanui: ”Tägä, necil mal oli 368. Pečengan ambuskelenddivizii. Mö olem pätnuded panda muštznaman, memorialan. Nece ei ole sur’ kivi, sihe mö olem kirjutanuded – ”Omištadas ambuskelenddivizijan voinmehile”. Voinan aigan tägä oli lujas äi kolnuzid, ved’ nene mad oliba minoiš”. Kaik muštpachad da stelad om tehtud sijaližes kivespäi – gabbrodiabazaspäi. Kived puhtastadihe da vaumitihe mugažo vepsän mal, sijaližiš cehoiš. Viž kived oigetihe Moskvaha sen täht, miše tehta kirjutesid da kuvan sil erižen tehnologijan abul. Kaik toižed radod oli tehtud ičeze vägel. I hot’ mugoine azj om harvinaine, kaik radod tehtihe čomašti da ičeze aigan. Šoutjärven ”Gabbro-komfort”-cehan pämez’ Roman Kir’utkin sanui: ”Mö pilim kiven surel pilal, jäl’ges siledoitim, tazoitim. Meiden radnik om kirjutanu kaik kirjaimed kivihe, kaik familijad”. Memorial avaitihe 9. päiväl semendkud. Karantinan taguiči sur’ praznik pättihe vedäda vähän möhemba. No kaik radod oli tehtud ičeze aigan, memorialoid pandihe ičeze sijoile. I nece azj toi vepsän man eläjile todesišt Vägestusen praznikad, hüvid melid da uskondad – mušt meiden ičhižiš da voinas kaitas igän! Vepsän kul’tursebr kitäb kaikid biznesmehid i Kalagen eläjid, ked ühtniba memorialoiden tegendaha i panendaha, i sanub heile sur’ spasib. Niiden keskes: Igor’ Mišukov, Roman Kir’utkin, Boris Jemeljanov, Vladimir Simakov, Pavel Šabanov, Dmitrii Gor’ko, Denis Kovalenko, Viktor Pančin, Andrei Dzevenis, Jurii Kočerin, Konstantin Saveljev, Maria Lebedeva. Tö olet tehnuded suren lahjan kaikiden Karjalan eläjiden täht!