Texts
Return to review | Return to list
Radam surel armastusel!
history
May 25, 2020 in 15:38 Нина Шибанова
- created the text
- created the text: Kaikutte visokosnii voz’ rahvahas lugetas jügedaks. Necil vodel völ-ki tuliba mugomad tartused, kut virus, pandemija. Aigmäričuz ”Ištum kodiš”… Se vajehti kaikiden ristituiden elon, se koski Vepsän fol’klorkeskusen radod mugažo. No sädandrad – nece om taimen, mitte kaiken vedäse päiväižennoks. Virus ei seižutand meiden radod. Ei sa kävelta meidennoks, no voib kosketadas meidenke telefonas, internetas, voib oigeta meile ičeze radoiden fotosnimkoid. Ani čomad oma videomastar’-klassad, miččiš om ozutadud, kut tehta tätüižen palaižišpäi. ”Kädekaz”-studijan ohjandai Tatjana Sergejeva tegi rolikan, miččes ozuti, kut tehta Äipäivän jänišaižen. Vepsän fol’klorkeskusen radnikad jatktaba tundištoitta ristituid vepsän rahvan veroidenke da kul’turanke. Mastarid ei vaiše starinoičiba vepsläižiden sädoiden polhe, no i ombliba kodiš sarafanan da ozutiba sen kaikile meiden lehtpolel VKontakte-verkos: https://vk.com/club44930663. Vepsän fol’klorkeskusen muzei mugažo ei heitänd ičeze radod. Ol’ga Spirkova starinoičeb rahvahale muzejan kaluiden polhe. Meiden gruppas avaitihe rubrik ”Pagižemei vepsäks”. Kaik gruppan ühtnikad – lapsed, mamad da tatad, babad da dedad, ühtes sizaridenke Anna da Svetlana Trifanovoidenke opendase pagižmaha vepsän kelel. Kaikutte vastuz mäneb ühtes ”Peiveine”-teatran tätüižidenke. Völ üks’ rubrik ”Vepsad mugažo vojuiba”, miččes ”Kodijured”-kluban ühtnikad starinoičiba ičeze heimolaižiden polhe, kudambad vojuiba. Maria Aleksejevna Abramova voinan aigan oli lapsen, hän starinoiči, kut hö siloi eliba. Völ Maria Aleksejevna lugi ičeze runon vepsän kelel. Vladimir F’odorovič da Tatjana Ivanovna Jetojevad sanuiba ičeze vanhembiden polhe. Galina Vasiljevna Okuneva lugi kirjeižen dedalpäi. Necen kirjeižen hö kaičeba voinan aigaspäi. Rubrikas ”Kaičemei vepsoiden veroid” mö starinoičem siš, miččid veroid oli i om meiden rahvahal. Mö lujas tahtoim nähta meiden kacujid koncertoil. Sid’-ki mö em sömäidanugoi. Meiden horeograf Julia Pigareva tegi ani čoman videokoncertan ”Muhada! Kacuhta peiveižele!” Neche videokoncertha oli pandud erazvuiččiden voziden lapsiden ozutelused. Ozutiba ičtaze i lapsed-mastarid! Mö em unohtanugoi sur’t-ki praznikad– Vägestusen päiväd. Meiden gruppan lehtpolel ozutim saldatoiden kaumoid, miččed oma meiden Vidlan agjas. Vägestusen päiväl Vidlan külän avoinirdal oli tehtud radiokoncert. Pajatadihe pajoid voinan polhe. Praznikanke ristituid ozateliba Piterin agjan gubernator A. Drozdenko, Podporožjen agjan pämez’ A.S. Kälin, Vidlan külän pämez’ A.V. Kuzneсov. Maria Lapikova tegi videokoncertan ”Spasib vägestuses!”. Kaik rahvaz voili kacuhtada erazvuiččiden voziden praznikozutelusid. Ned koskiba kaikuččen ristitun südänt. Kaik oli tehtud surel armastusel meiden kodiman istorijaha. Mö mugažo ühtnim erazvuiččihe online-konkursoihe: lapsed da aigvoiččed ristitud pirdiba, pajatiba, lugiba runoid, starinoičiba voinan polhe. Lapsed ühtniba pirdatusiden konkursaha. Vepsän fol’klorkeskusen radnikad mugažo ühtniba akcijaha ”Sur’ voin – sur’ vägestuz”. Äjile ristituile tuli mel’he, kut pajati Sergei Abramov. Ninga tegese kaiken, konz armastad ičeze radod. Mö, Vepsän fol’klorkeskusen radnikad, kaiken olem ihastusiš ozutada teile ičemoi sädandradod.