Texts
Return to review | Return to list
Minun kodiman pajod
history
October 14, 2021 in 19:01 Nataly Krizhanovsky
- changed the author of the source
from Gul’a Polivanova
to
December 09, 2020 in 09:44 Нина Шибанова
- created the text
- created the text: Mö olem jo harjenuded, miše meiden man eläjad, Vidlan fol’klorkeskusen radnikad paksus vägestaba erazvuiččiš konkursoiš da saba hüvid satusid ičemoi rados. No kaik-se hö čududeleba meid kaiken aigan. “Minun kodiman pajod” («Мои родные напевы») – mugoine nimi om programmal da projektal, mitte kosketi henged kaikil kacujil. Se korktas arvostadihe regionas. Necil kezal projekt sai toižen sijan da tugen vähäluguižiden igähižiden rahvahiden konkursas, miččen oli tehnu Piterin agjan sijaline Rahvahaline komitet. Nel’l’ pit’käd kud “Vepsarija”-sebran aktivistad, sebran pämez’ Maria Lapikova da Vepsän fol’klorkeskusen radnikad hüvin radoiba da vaumičiba interaktivižen programman “Minun kodiman pajod”. Programman pohjaze om ottud vepsän rahvahan tradicijad da verod, sen bohat kul’tur da istorii. Projektas radab koume Vepsän fol’klorkeskusen kollektivad: “Peiveine”-tätüteatr, rahvahan “Armaz”-fol’kloransambl’, “Kädekaz”-studii. Ohjandab programmad Anna Viktorovna Trifanova. Hän kitäb Jelena Vasiljevna Simanovad, kudamb oli hänen edeltajan da necen programman ezmäižen tegijan. Voziden sirttes programm vajehtihe, sihe ližatihe uzid azjoid, melentartuižid idejoid, da lopuks se tegihe čudokahaks spektaklikš! Anna Viktorovna da hänen sizar’ Svetlana Viktorovna Trifanova oma spektaklin vedäjad. Suren abun neciš rados tegi “Armaz”-ansambl’an ohjandai Julia Olegovna Pigareva da “Kädekaz”-studijan pämez’ Tatjana Nikolajevna Sergejeva. Kaik azjbumagad vaumiči Maria Mihailovna Lapikova. Projektan tegijad sanuba, miše hö pit’kha tegiba scenarijan, repetiruiba, ostiba materialad dekoracijoiden täht, valičiba scenad ezitusen täht, eciba transportad. I lopuks necen suren radon satusid voiliba nähta kacujad. Spektakliš vändiba ei vaiše kollektivoiden ohjandajad, no toižedki – lapsed da aigvoččed, kaik, ken surel tahtol opendasoiš da radaba Vepsän fol’klorkeskuses. Ezmäine programman ozutez oli 29. redukud Podporožjen kul’turan da joudajan aigan kompleksas. 31. redukud programman nägištiba kaikid tärktembad da hüväsüdäimeližed kacujad – vepsän man edahaižiden küliden – Kurban da Järviden eläjad. 7. kül’mkud se ozutadihe Vil’halas-ki. A Taidehen öl, 3. kül’mkud, spektaklin kacuiba Vidlan eläjad. Programman lopus kacujiden täht oli vedetud melentartuine viktorin lahjoidenke. Ozatelem Vidlan vepsän fol’klorkeskusen kaikid radnikoid, sen vajehtont pämest – Nadežda Mihailovna Koval’skajad, programman kaikid tegijoid suren vägestusenke da toivotam heile uzid satusid, a meile – hüvid, melentartuižid spektaklid da hüvid melid.