Texts

Return to list | edit | delete | Create a new | history | ? Help

Nina Arhipova. Pisara-matkalaini. 6

Corpus: Literary texts

Epic work (Literary (author's) tale)

Source: Arhipova, N., Pisara-matkalaini : [suarnu], (2018)

Nina Arhipova
Pisara-matkalaini. 6
(Karelian Proper)

Pisara näki unta.
Oli lämmin kešä. Hiän ui pieneššä purošša. Tuttava jäniksen poikani karjahti rannalta:
Rupiemma juokšomah kilpua.
Ken rutompah juokšou meččäh šuaten, še on voittaja.
Ruvekka, vaštasi ilosena Pisara.
Puron vesi poikkoseh lirasi kivien välissä. Rantua myöten täyttä vauhtie laukkasi Pitkäkorva, hänellä ei ollun aikua kačella ympärillä, piti piäššä voittajakši. Kaččou, ka ei niä puruo, še yhtäkkie minne lienöy kato. Pietty vähäkši aikua.
Missä šie, puroni, olet? karjahti hämmäštynyönä Pitkäkorva.
Mie muutuin tumannokši. Missä on tumanto, šielä olen mie, vaštasi Pisara ilmašta. Juokše ielläh.
Niin še läksi lentoh meččyä kohti. Pikku jänis huomasi tumannon ta hyppeli šen peräššä. Piti jatkua kilpailu. Vähän ajan piäštä tumanto kato.
Missä šie, tumanto, olet? karjahti Pitkäkorva.
Ka mie nousin taivahalla, muutuin pilvekši, kačo ylöš, tai niät miut, kuulu loittuota pikkaraisella jäniksellä. Juokše ielläh.
Pilviki läksi lentoh meččyä kohti. Pikku jänis huomasi pilven ta kiirehen kautti hyppeli eteh päin. Pitäy piäššä voittajakši. Yhtäkkie rupesi vihmumah. Jäniksen poikani mäni kuušen alla peittoh, jotta vesi ei mänis korvih. Kotvasen vihmu ta pilvi tuaš kato.
Missä šie, pilvi, olet? kokonah hermoštu Pitkäkorva.
Ka mie olen šiun käpälien alla, muutuin pisarakši, kačo muah, tai niät miut, kuulu puun juurelta pikku jäniksellä.
Niin ne yheššä tultih meččäh. Ken voitti täššä kilpailušša, Pisara ei tietän. Jäniksen poikani niise ei ymmärtän mitänä ta mäni männeššäh meččäh...