Texts
Return to list | edit | delete | Create a new | history | Statistics | ? Help
Tatjana Semečkina. Rohkie Villikkö
Tatjana Semečkina
Rohkie Villikkö
Karelian Proper
New written karelian
Elettih
ennein vanhah yhellä huuttorilla isäntä ta emäntä .Heilä oli šuuri kotitalouš : lehmie , lampahie , kanoja .
Isäntä oli vielä i meččämieš .Kyllä hänellä oli hyvä meččäkoira , monta kymmenie oravoja , meččoja tai hirvijä šai šen kera isäntä .
Vain koira vanheni , šen kuulo ta näkö mäntih .Päiväset venyö rojottau rappusilla .
Mieš otti nuapurilta nuoren pennun .Kyllä še oli poikkoi , vesselä , helieiänini penikkä .Kohta šiitä tuli hyvä apulaini emännällä .Pentu šuatto lehmie paimennušmualla , ajo lampahie kotih .
Emäntä oikien tykkäsi penikkyä .
– Kyllä še on villikkö , aina šano hiän .
Niin še šana tuliki pennulla nimekši .
Šykyšyllä , kun kuokittih potakat , kerättih kašvit , emäntä piäšti kanat pellolla .Šiinä šei näytti penikkä villiluontuoh : še alko niin ajella kanoja ta ne noššettih šemmoni karjeh , jotta še kuulu revon korvih .
Monta vuotta repo ei ole käynyn tällä huuttorilla , kun šillä oli hyvin tuttu isäntien entini koira .Pikkuista ei puuttun repo šen hampahih !Ta niin revolla rupesi himottamah maissella kananlihua , jotta še uškalti lähtie huuttorin šuuntah – eikö šais mitä .
Kun vain repo tuli , ni heti livahti aijan läpi , šieppasi kanasen hampahih tai mäni männeššäh .
Kyllä šiitä Villikkyö kuritettih : kukko n’okkasi , emäntä vičalla ruašakoičči , a isäntä pani pennun čieppih .
Mäni monieš päivä .Emäntä tuaš piäšti kanat pellolla ta kukko varteičči niitä aijalla istuon .
A revolla niin maistu kananliha , jotta tuaš ni läksi ečolla .Še tunkeutu aijan läpi ta näki , jotta ihan vierellä on vorssa kukko .Repo šieppasi šen hampahih ta juokšomah meččäh päin .
Kukko nošti karjehen :
– Apuh , apuh !
Emäntä piäšti Villikön čiepistä ta pentu haukkuon kapšahtu tavottamah .
Poikkoseh luikki repo , ka termäh nouššešša jo alko vaipuoki – kukko oli jykie tai iče repo jo vanha .Šiinä še Villikkö tavottiki revon ta tarttu šillä häntäh .Repo kompaštu ta piäšti kukon hampahista .
Kukko pyreyty puun okšah ta kiekkumah :
– Vapua olen , vapua olen !
Pentu piäšti revon hännän ta še vilahti meččäh .
Kyllä še ihaštu emäntä , kun Villikkö ta kukko kotiuvuttih !Pentu enämpi ei ajellun kanoja , kun oli niijen vahtina ta hiäteli kanoja aijašta lähemmäkši kotie .
Talvella isäntä rupesi käyttämäh Villikkyö mečällä .Vuosien mittah pennušta tuli hyvä meččäkoira .
A repo konšana enämpi ei käynyn huuttorilla .Tiesi , jotta šielä on hyvä vahti .
Rohkie Villikkö
Karelian Proper
New written karelian
–
–