Texts

Iltašuarna

September 20, 2021 in 12:05 Нина Шибанова

created the text
created the text: – Kunne hiiri hiihät? – Läksin puupurašta käymäh. – Mistäpä šuat puuta? – Kuuvven vuuvven kuušikošta. – Missäpä on še kuušikko? – Kulujan kuutoman valtijošša. – Šuatko puuta kuatua? – Kirvehellä hakuan. – A kun puu piällä lankieu? – Mie ympäri kantuo juokšen. – Kuušella on okšie. – Mie kirvehellä karšin. – Onko hyvä kirveš? – Terä niin kuin peili, Hamara kuin kello, Varši niin kuin käsi, Iče okšie karšiu. – A kun nälkä tulou? – Mie lehtisie ta havusie šyön. – A kun vaččua puhaltau? – Mie puikkosella puhkuan. – A kun veri lähtöy? – Mie voitiella voijan. – Mistäpa šiula voijetta? – Lehmän utarešta maituo, Kontien šuolešta rašvua, Ahvenen šilmäštä kyynälie, Kikin mal’l’ašta lisyä. – A kun tulou ikävä? – Mie laulusie laulan. – A kun mečaššä ekšyt? – Tähtijä myöten piäšen. Tähet näytetäh tietä, Kuutoma valottau matan, Illalla tulen kotih. Koissa kiukua on lämmin, Koissa vuotetah lapšet, Piisissä paletah tulet, Šankija paisto ämmö. Pehmieni šänky on valmis, Šilmät ne männäh umpeh, Muhahuš pietty huulih. Uni liikkuu kuin kišša, Hil’l’akkaisešti aštuu, Hiän on jo melkein täššä, Makua, miun armaš lapši!