Texts
Return to list
| edit | delete | Create a new
| history
| Statistics
| ? Help
Valentina Libertsova.
Hyvittelyt “Kalevalan” metriekan mugah
genre: Lyric work
Source:
Oma mua. № 9, 2021, p. 11
Valentina Libertsova
Hyvittelyt “Kalevalan” metriekan mugah
Livvi
New written Livvic
Hyvittelen kaikkii naizii,
Kaikkii naizii karjalazii,
Inehmizii liygiläzii,
Kaikkii omii lyydiläzii,
Da vie tverinkarjalazii,
Yhtes pohjaskarjalazii
Dai rajan tagan eläjii!
Hyvittelen tävvel hengel
Mamiloi, lapsii kandelijoi,
Suaduu rauhas kazvattajii,
Lapset tervehet da raviet.
Hyvittelen hyväl mielel
Buabiloi, abuh kiirehtäjii,
Neičukkazii pikkarazii,
Neijistäjii tyttö-rukkii,
Nuorel ijäl, opastujii,
Andilahakse menijöi.
Hyvittelen kaikkii naizii,
Kaikki naizii karjalazii
Naizienpäivän kaunehenke,
Kevätpäivän päiväzenke,
Kukkazien da lahjazienke,
Suvaičendan ihalmonke.
Jogahizel toivottazin:
Anna andau Ylijumal
Tervehytty da čomuttu,
Kaikkie ihastustu uuttu!
Ozua, lykyy, pitkiä igiä,
Ken vai midä iče tahtou!
Teijän Val’a Libertsova,
Alavoizes eläi naine.