Texts
Return to list | edit | delete | Create a new | history | Statistics | ? Help
Peša Ruočin paginoi. Virzun Johoran lubaus
Peša Ruočin paginoi. Virzun Johoran lubaus
Livvi
New written Livvic
V irzun Johor oli
vähäzen laškansorttine mužikku .Häi ei liigoi askelii pakotta ottannuh .Hänen mieles oli parembi vuaksu vuarua , kui virztu viäriä .
Erähän kerran häi oli joginurmel niittämäs heiniä .Ku häi oli kolme päiviä kosan ker heilunnuh , loputtih evähät .Ei muu auttannuh , kui pidi lähtie kois tuomah einehty .Häi otti kaššalin selgäh da lähti matkah .
Pahakse lykykse hänen kodikylä , Gribaselgy , satui olemah toizel puolel jogie .No , ei hädiä , joven poikki luadittu sildu .‒ Vai ei se sildu sattunnuh olemah hänen nurmen kohtal , se oli nenga puoldu virstua alebannu .
Johoran mieles sinne oli liijan pitky matku .Vähembäl vaival piäzöy , ku hyppiäldiä parren selgäh da koittua sidä žeštuo joven poikki .(Hos’ainovan suma näit sih aigah kulgi joves ).
Johor otti käzih pitkän seibähän , valličči ylen sangien parren da kapsahtih sen selgäh .A se parzi ei Johorua suvainnuh .Se rubei ylen äijäl pyörimäh da keikkumah .Johor opitteli čubiloil parren pyörimisty azetella , vai ei se auttannuh .Kodvazen peräs häi bul’ahtigi vedeh .Jogi oli syvä da virdu vägevy .Johoral tuli tozi edeh .Hädäpäivis häi musti Sv’atoi-Valassin , kudamal häi lubai panna kahten griunan tuohuksen kirikköh , jos vai häi auttau händy parren selgäh nouzemah .‒ Sv’atoi-Valassi auttoigi hänet .
Vai kui terväzeh Johor piäzi parrel , häi bul’ahtih toizen kerran vedeh .Täl kerdua häi lubai 50 kopeikan tuohuksen , jesli Aleksandr Svirskoi piästäs hänet bedas .No , piästihäi hänet häigi .Vai Johor ei tälgi kerdua hätkie pyzynnyh parren piäl .Parzi rubei pyörimäh väkkäränny , dai häi oli tuas rähmälleh veis .Täl kerdua häi lubai ylen sangien tuohuksen Pyhän Pedril .Tämägi autoi , vai autoi pahakse lykykse parren vettynyöl puolel , kudai oli jo äijäl glisnivynnyh .Kahten sekundan peräs Johor oli uuvvemban kerran parttu säbäilemäs .
Nygöi vaste Johor rubei tozi hädä tulemah , ku nägi , kui virdu händy vei suorah Hiijenkoskeh .Hänen harvat tukat kai noustih pystyh , hos märgy hattu oli piäs .Suures hiäs da kiirehes häi lubai panna rubl’an tuohuksen kaikkil sv’atoloil , kedä vai satui mustamah da vie Sv’atoi-Miikulal erikseh kolmen rubl’an tuohuksen , ku vai hyö hänet täs bedas da tuskas piästettäs .Nämä joukolleh autettihgi Johorua da häi piä zi randah .
Ku Johor seizoi tugevasti kuival mual , häi rubei pidämäh čottua sit , kui äijän velgua häi oli sv’atoloil luadinnuh .Ku häi piäzi čotas viidehkymmeneh rubl’ah da dogadi , gu luvattuloih tuohuksih olis mennyh kogo hänen "heimantti ", häi kiändyi pogostan kirikköhpäi , pyhki leviel kämmenel parduadah , kumardih da sanoi : "Kaikil auttajil anna saman čestin : ni kel nimidä !"
Peša Ruočin paginoi. Virzun Johoran lubaus
Livvi
New written Livvic