Texts
Return to list | edit | delete | Create a new | history | Statistics | ? Help
Peša Ruočin paginoi. Vastukavaine akku
Peša Ruočin paginoi. Vastukavaine akku
Livvi
New written Livvic
Ku
poigu tulou sih igäh , što hänel rubieu kazvamah usat , häi algau vähitellen iččelleh hommuamah akkua .Sama duumu tuli Kablukan Mihailal mieleh , ku hänengi leuvvas algoi čirhottua parduhaivenii ."Akku ei ole kui kandeleh seinäl ", sanou sananpolvi .
Pidäy tarkah harkita , millazen kabjan ičelleh ottua .(Tyttöpiäny olles kai naizet ollah hyvät , vai akakse piästyy heis monet kiänetäh karvu muurin .)
Mihail oli jo ičelleh tulien akan valmehekse primiettinnyh .
Erähänny piänhäi tuligi muamah luo da sanoi :
‒ Muamo , blahoslovi minut , ku minä nygöi lähten akanottoh !
‒ A kenetbo sinä , poigane , olet duumainnuh ottua !
kyzyi muamo .
‒ Ga otan Riivinlauvvan Paraskoin .
‒ Älä , hyvä poigane , ota händy , häihäi kuuluu on ylen zabjakko , ei häi rubie sinuu kuundelemah , huolehizennu sanoi muamo .
‒ A menetiijä i kuundelou , sanoi Mihail , ‒ blahoslovi vai !
No , muamo i blahoslovi , da Mihail otti akakse sen Paraskoin .Svuad’ban jälgeh huondeksel Mihail vuotteli , konzu Paraskoi keittäy hänel koufin , vai eihäi tämä uuzi-mučoi olluh ni mielläh , kaččeli vai ičiedäh zirkalos .A Mihailal oli suuri , mustu kaži , kudai istui golbičal da pezi neniädäh .Häi kiändyi kažihpäi da sanoi :
‒ Keitähäi sinä , "Joška ", ylen raviezeh koufi !
Vai eihäi se olluh ni milläh , muutti vai käbäliä da rubei pezemäh korviidah .Mihail käski sidä toizen kerran , käski kolmanden ‒ sama tulos .
‒ Vai et sinä , šmetku , minuu tottele , kačo minä sinut opetan !
ärähtih Mihail .
Häi koppai "Joškan " käzih da työndi sen Paraskoin helmoih .Samal häi sidoi kušakal Paraskan helmat umbeh , tembai piiruavärtinäzen da sil rubei pergamah "Joškua ".A se "Joška " sie pussis hyppi kui mieletöi , vongui da riiboi teräzil kynzil Paraskoin jalgoi .(A nenga meijän kesken tulgah sanotukse , što Salmin naizil ei vie sih aigah olluh jallas "nimettömii ".)
‒ Älä , Mihkail-rukku , lyö "Joškua ", minä keitän koufin , "Joškan " eis !
lubaili Paraskoi .
‒ No , ku keittänet , ga keitä , sanoi Mihail da piästi "Joškan " helmois iäres .
Tämän jälgeh Paraskoi oli ainos valmis palvelemah Mihailua .Hänen ei tarvinnuh muudu kui vai burahtaija "Joškal ", ku Paraskoi oli jo menos sen puoles dieluo toimittamah .
Pahakse lykykse "Joška " vuuvven peräs kuoli , mi liennöy vezikauhu sen tappannuh .Tämän jälgeh Paraskoi muutui kogonah , häi ei ottannuh ni kuulevih korvih , midä Mihail hänel sanoi .Ku Mihail käski händy keittämäh čuajuu , Paraskoi sanoi :
‒ Engo keitä , keitä iče !
Da ku Mihail käski pestä paijan , Paraskoi sanoi :
‒ Engo peze .Vai piijakse minut tänne toit , peze iče !
Mihail duumaičči da duumaičči mil opil häi sais akkah tottelemah .Lopuškal hänel valgeni .Häi piätti käskie silloi , ku olis pidännyh kieldiä da kieldiä silloi , ku olis pidännyh käskie .
‒ Paraskoi , älä peze sidä paidua !
sanoi Mihail .
‒ A vot , pezen dai pezen !
‒ No , hot’ pesset , ga älä sidä silitä !
‒ A vot , silitän dai silitän !
‒ Paraskoi !
Tänäpäi sinä ei sua luadie sul’činoi .
‒ A vot , lain dai lain , ihan nareko lain !
Erähänny piän Mihail lähti joven tuakse kyndämäh .Huondeksel lähties sanoi Paraskoil :
‒ Minä menen randupellol kyndämäh , vai sinä et sil aigua pastua šipanniekkoi !
‒ A vot , pastan dai pastan , sinuugo varuazin !
‒ No , hot’ pastannet , ga älä niidy tuo pellol !
‒ A vot , tuon da tuon , neprenemmo tuon !
Mihail myhäili pardaheh da lähti pellol .Odva oli kulunnuh aigua kaksi čuassuu , ku häi nägi , što Paraskoi tulla viuhotti suuri kaššali selläs .(A heijän välil oli aiga syvä jogi , kudaman poikki oli pandu vai yksi porraspuu .)
Mihail kirgui joven poikki Paraskoil :
‒ Älä jätä niidy piirualoi sil puolel jogie !
‒ A vot , jätän dai jätän !
‒ Ga , jos piiruat jättänetgi , ga et sua panna kaššalih kivii !
‒ A vot , panen dai panen !
Paraskoi purgi piiruat da lad’d’ai kaššalin täydeh kivii .
‒ Älä vai , Paraskoi , kaššali selläs tule täl puolel jogie !
vakusti Mihail .
‒ A vot , tulen dai tulen , kiččikočči tulen !
Paraskoi lähtigi kaššali selläs tulemah porraspuudu myöte .Ku häi oli piässyh keskel jogie , Mihail huikkai :
‒ Paraskoi !Älä vai häily kaššalin ker !
‒ A vot , häilyn dai häilyn , ihan nareko häilyn !
Dai , upr’uamoi ku oli , häi rubeigi häilymäh .Sit ku häi erähän kerran häilähtih ...ga bul’bukkazet vai joven pohjas noustih .
Mihail meni toizel puolel jogie da rubei syömäh niidy Paraskoin luadimii piirualoi .Sen piäl häi otti pienet n’okku-unet .Ku häi havaččui , häi lähti juoksemah kyläh .
‒ A nennii kummii !
voivotteli häi kyläh tulduu .‒ Se meijän Paraskoi pakui jogeh !
Läkkiä , hyvät nuaburit , händy eččimäh !
Mužukat lähtiettihgi joukol nuaruamah Paraskoidu .Kogonastu kaksi päiviä hyö nuarattih joven pohjua , vai Paraskoidu hyö ei löyvvetty .Lopuškal Mihail smekni da sanoi :
‒ Ečitähbo händy vastuvirdah , minä luulen , što häi löydyy siepäi !
Da siepäi Paraskoi löydyigi .Kolme virstua oli , kehvelin riähkytukku , vie kuoltuu vastuvirdah noussuh !
Mihail järjesti Paraskoil hyvät muahpanizet .Minutgi niih kučuttih .Menin da kummastelin sidä , ku Paraskoi-pokoinniekku oli pandu ruuheh vačalle .
‒ A , miksebo oletto Paraskoin pannuh nengalei ruuheh ?
kyzyin Mihailal .
‒ Kiändyy , häi vastai ykskandah .
Kahten vuvven peräs kaivettih uuzi haudu Paraskoin hauvvan rinnal .Sidä kaivajes erähän kaivajan loma lipsahtih da satui Paraskoin ruuhen bogas murendamah palazen laudua .Kačottih loukkozes , ga Paraskoi magai ruuhes sellälleh .
Peša Ruočin paginoi. Vastukavaine akku
Livvi
New written Livvic
‒
‒
‒
‒
‒
‒
‒
‒
‒