Texts
Return to list | edit | delete | Create a new | history | Statistics | ? Help
Tatjana Semečkina. Šynnytyšliäkärin muisselmie ruavošta
Tatjana Semečkina
Šynnytyšliäkärin muisselmie ruavošta
Karelian Proper
New written karelian
L opetettuo Sortavalan liäketiijollisen opiston vuotena
1969 mie ruavoin felššerinä Šonka-pos’olkan felššeri - ta šynnytyšliäkäripunktissa .Konša šiirryin elämäh Kalevalah , ni työškentelin "enšiavulla ", Kalevalan lespromhosin liäkintäašemalla , 2.päiväkojin šairahienhoitajana .Ka šuurimmalla rakkahuolla muistelen omua ruatuo pos’olkan šynnytyšošaštošša .Mie ruavoin šynnytyšliäkärinä ta vaštašyntynyijen huonehen šairahienhoitajana .
Kalevalan šynnytyšošaštošša mie ruavoin vuuvvešta 1974 alkuan .Šilloin šielä ruattih liäkäri Svetlana Godunova , piäšynnytyšliäkäri Praskovja Kulakova , šynnytyšliäkärit Vera Malikina , Jelena Žuravl’ova , Nina Sem’onova .Kiitollisuolla muistelen apuhoitajie Feodosija Karhuo , Ol’ga Laukkaista , Anastasija Čudinovua , Tamara Vasiljevua .
Vuuvvešta 1977 miut miärättih ošašton piäšynnytyšliäkäriksi .Nyt haluosin kertuo muutoman jutun omašta työkäytännöštä .
NELLÄ YHEŠŠÄ VUOROŠŠA
Mie šain šynnytyšapukokemušta vielä harjottelun aikana opistošša , missä iče autoin muutomašša šynnytykšeššä .Šonkašša piti kolme kertua auttua šynnytykšeššä koissa , muun muašša omašša korttierissa taškulampun valošša .Šilloin šähkö Šonkašša toimi puoliyöh šuaten , a mie en kerinnyn šytyttyä lamppuo .Kerkisin vain auttua jakšua palton ta ottua puhtahan lakanan lašta varoin .
Konša ruavoin enšiavun felššerinä , kävin ottamah lapšenšuajie .En ottan naista matkah häntä tarkaštamatta , šentäh piti auttua šynnytykšeššä Kuušiniemen , Vuonnisen felššerita šynnytyšliäkäripunktiloissa .Matkuššin helikopterilla Luušalmeh , Vuokkiniemeh , rakennettavah Koštamukšeh ottamah lapšenšuajie .
Kerran tulin yövuoroh , a šynnytyšliäkäri jätti miula rošenčan .Mie tiijuštelin , mitein pärjyäy kakši pakšuo naista , kumpasie mie otin vaštah päivävuorošša .Hiän vaštasi , jotta kaikki on kunnošša .A noin kymmeneltä illalla meilä šynty tyttö .Naini työnnettih huoneheh .Apuhoitaja Ol’a-täti šiivosi šynnytyššalin .Mie kuvasin šynnytyštä , täytin vaštašyntynyijen tervehyštietoja .Prenatalihuonehešta tuli huolikaš pakšu naini .Mie tarkaššin hänet – šynnytyštoiminta oli aktiivini .Kaikkien hoitojen jälkeh mänimä huoneheh .Juuri šilloin šoitettih enšiavun ruatajat ta šanottih , jotta kohta tuuvvah rošenčča .Ottima
naisen vaštah .Puolen tunnin piäštä hiän šujuvašti šai pojan .
Šiirtimä naisen huoneheh , šynnytykšen jälkini huoneh oli jo täyši .Tuli toini pakšu naini ta ilmotti , jotta poltot keššetäh jo kolme minuuttie .Tarkaššin hänet – šynnytyštoiminta oli aktiivini .Šilloin šynnytyš alko kolmannella naisella , hiän šai tytön .Kuuvvelta huomenekšella kaikin havaččeuvuttih , šyötettih lapšie .Ohkasi ta pön’n’isti nelläneš rošenčča .Hiän šynnytti pojan .Kahekšalta huomenekšella šoitti päivyštäjä liäkäri .
– Tuli yksi rošenčča ta nellä vaštašyntynyttä , mie ilmotin .
– Onko teilä šuunnittelomattomat kolmoset ? kyšy liäkäri .
– Ei , kaikki on yksittäin : kakši tyttyö , kakši poikua , mie vaštasin .
– Oho työ , uuraštajat !
Ennein en konšana auttan šynnytykšeššä nelličči yheššä vuorošša .1970–1980-luvulla šiinä ošaštošša ruattih Nina Belous , Irina Karhunen , Larisa Plotnikova , Ol’ga Stafejeva , Lidija Kirdejeva , Nina Molotkova , Nadežda Andrejeva , Natalja Sem’onova .
VUOTTAMATTOMAT KAKŠOSET
Mie tulin yövuoroh , miula annettih rošenčča .Vuoron šynnytyšliäkäri arvautteli šuurta šikijyö , tarpehen mukah piti kuččuo liäkäri .
Kuni kaikki oli rauhašša , mie ruavoin omie työtehtävie .Aikataulun mukah tarkissin naisen , kuuntelin šikijön šytämen lyöntyä .Miula on hyvä kuulo .Kuulin ritmin eruo vašemalta ta oikielta .Otin sekuntikellon – še oli totta , vašemalta ritmi oli ruttoni , tarmokaš , a oikielta – ušie ta hellä puitto pikkaraini kello tikettäy .Tarkaššin , lapšet venyttih piät eri šuuntih .Šoitin enšiapuh .Šielä vaššattih , jotta kerätäh prikatie kiirehelliseh leikkaukšeh , lähettih ottamah meijän liäkärie .
– Kyšykkyä liäkärie šoittamah ošaštoh leikkaukšen jälkeh , mie šanoin .
Harjottelušša vanha šynnytyšliäkäri opašti milma miäryämäh lapšen šukupuolen šytämen lyönnän mukah .Mie erehyin oikein harvoin .
Mie varotin apuhoitajua Fen’a-tätie mahollisista kakšosista .
– No šilloin šynnytämmä kakšoset , rauhallisešti šano miun apulaini .
Enšimmäisenä šynty hyvännäköni ruumihikaš poika .Melkein heti veikon peräh ilmešty pitäččäini hieno tyttö .Šiitä melkein kuukauven ajan hiän oli meilä ta liho .
Šoitti telefoni .Fen’a-täti vaštasi , jotta šaima kakšoset ta kaikki on kunnošša .Päivyštäjä liäkäri Andrei Plotnikov toi sterilointiašteita , Fen’a-täti ihaššutti häntä kakšosilla .Šukissa Andrei Pavlovič juoksi käytävyä myöten , mäni lapšien huoneheh ta sualivoitteli , jotta ei ollun nähnyn kakšosien šyntymistä .Parin vuuvven piäštä myö liäkärin Nadežda Pavlovna Sazonovan kera ottima vaštah kakšoset .Mie otin enšimmäisen pojan , hiän otti toisen .
7. ŠAJEKUUTA
Tuanoin mie tapasin Lida Matuhinan , ennein hiän ruato apuhoitajana šynnytyšošaštošša .Muistelima eräštä yövuoruo , tuuli kovašti .Tuntu , jotta tuuli revältäy ošašton katon .Kuittijärvi riehu .A meilä šynnytti naini ta valo šammu .
Ennein šynnytyštä Lida näpisti pärettä keppijä varoin .Hiän kapšahti taloušhuoneheh ottamah laštuja .Mie vain kerkisin šanuo , jotta tulitikut ollah lipaštošša .Lida toi kannen sterilisattorilta , tulitikkuja ta rupesi šytyttämäh laštuja .
Mie ymmärrin mi on yönäkö , konša autoin šynnytykšeššä taškulampun valošša .Šinä kertana mie niise nävin kaiken .Myö šujuvašti šaima tytön , konša ilmešty valo .A rošenčča ei ni huomannun šitä .Ka meilä Lidan kera šelät oltih märät .
ILO UKKUO VAROIN
Naiset eri tavoin reagiiruijah erähän šukupuolen lapšen šyntymiseh .Ka yhellä heistä oli epätavallini reaktijo .Kahen pojan jälkeh hänellä šynty pieni hyväččäini tyttö .Muamo heti rupesi voivottelomah .
– Mitä iluo ! Kuin ukko iloštuu , Lenočka !Kuin lujašti ukko rupieu tykkyämäh šilma !
Myöhemmin šaima tietyä , jotta ukolla on kolme poikua ta heilä on kuuši poikua .Hiän kyšy omua naista ta min’n’oja šynnyttyä tyttären .I vot , lopulta ilmešty Lenočka !
"AVARUŠLENTÄJÄ " TA "RAJAVARTIJA "
Fen’a-täjin kera myö monikertasešti auttoma šynnytykšeššä . Meilä šynnyttih "avarušlentäjä " Jura Kosmonautiikkapäivänä ta "rajavartija " Rajavartijan päivän uattona .Ottuas’s’a vaštah "rajanvartijua " mie šain harmaita hivukšie .Heti kun naini pantih stolalla , puristu lapšivesi ta ilmešty oikie käsi .Ka Fen’a-täti niin taitavašti ohjasi šynnytyštä , jotta onnissuin šuaha lapšen vammoitta .
Kerran rošenčalla lapšivesi puristu stolalla ta pikkaraini lapši ui miun käsih , ta myö molommat olima märät piäštä jalkoih šuaten .
Miula ruato šynnytyšošaštošša on miun työelämäkerran parahie ta kirkkahimpie aikakaušija .
Šynnytyšliäkärin muisselmie ruavošta
Karelian Proper
New written karelian