Texts
Return to list | edit | delete | Create a new | history | Statistics | ? Help
Mošnikov Il’l’u . LEIBY
Mošnikov Il’l’u
LEIBY
Livvi
New written Livvic
Eli
loitton mečäs pieni harmai Hiiri .Yhtenny piän lähti se kävelemäh meččiä myö , sualistu eččimäh .Astui pitkän palan da nägi kannon al suuren leivän .Se ei olluh prostoi leiby , a oli ylen hyvä , pehmei da magei !Hiiri ihastui da sanoi ičelleh :
– Täs leiväs minule hätkekse täydyy ...Kuivuan zuuharikse ...Vuassua keitän .
No oli vai yksi viga – leiby oli ylen suuri , a Hiiri pieni .Et midä rua , istuihes Hiiri leivän edeh da rubei vuottamah , a gu ken siiriči astuu , sitgi avvuttau .Ei mennyh kodvua aigua dai nägöy Hiiri : troppastu myö Oravaine juoksou .
– Oi , Oravaine , tules tänne , ole moine hyvä !
– Mibo rodih ? pöllästyi Oravaine .
– Älä varua , ei nimidä mostu pahua roinnuh , minul on sinuh yksi dielo ! Avvutatgo minuu tämän leivän minun kodizessah ribaittua ?Sit sinä voit puolen ottua .
– Avvutan , hyväs mieles vastai Oravaine .
Ezmäi hyö otettih kaksi keppii da opittih nostua leiby niilöin piäle , ga ei vuidinuh .Ylen on jygei da suuri leiby .Väzyttih .
Myöstin istuu Hiiri leivällyö , vaigu nygöi Oravazenke .Vuotetah , toinah kengi siiriči juoksou .Ei mennyh kodvua aigua dai sih juoksi Reboi .
– Oi , a midäbo työ täs istutto , midäbo vardoičetto ?A iče muga kaččou leibäh , muga huulii n’abliy .
– Ga vot leibiä vardoičemmo ! sanoi Oravaine .
– Voizitgo avvuttua meidy kandua tämän leivän minun kodizessah , minähäi sen lövvin ? kyzyi Hiiri .– Tulduu jagazimmo sen kolmekse palakse .
– Hyvä , muhahtih Reboi . Otti da terväzeh lykkäi leivän selläle da hypyl juoksi pimieh meččäh , a Hiiri da Oravaine jiädih istumah nurmele .
Reboi juoksou da nagrau :
– Oi mi hyvä , hos leibiä kylläl syön , muuduhäi ei ole .
Omah pezäh tulduu odva tungi leivän sydämeh , istuihes huogavumah .Kuspäilienne kuului iäni :
– Miksebo leivän varrastit Oravazel da Hiirel ?Heilhäi sežo on nälgy .Sinul pidi avvuttua heidy kandua leiby da jagua se kolmele .Miksebo sinä , Reboi , kaiken ijän tahtot hoival eliä , vai omua iččie zobotit ?Eigo parembi olis yhtes ruadua da eliä kaikkienke sobuh ?Varrastajen et elostu kohenda .Jälgimäi ei jiä nikelle nimidä .
Nämmien sanoin sanottuu leiby muutui kivekse .Ei Reboi sidä voinnuh syvvä da jäi tirpamah nälgiä omas pezäs , a Hiiri da Oravaine vai kävelläh meččiä myö da sualistu suajah .
LEIBY
Livvi
New written Livvic
–
–
–