Texts
Return to review | Return to list
HUOLEKAS MUŽIKKU
history
January 17, 2023 in 13:51 Нина Шибанова
- created the text
- created the text: Kindahalaine suarnu Kindahan mužikat nimidä putilleh ei maltettu ruadua. Erähänny piän yhtel kyläläzel mužikal juohtui mieleh: ”Enhäi vie ni halguo ole varustannuh”. Val’l’asti häi hevon, otti pilan da kirvehen da ajoi meččäh. Sie hätken ruadoi, loppi ruavon da duumaiččou ičekseh: ”Puutui nygöi halguo suaja”. Illan hämäris rubei häi halgoloi regeh mättiämäh. Ylen suuren rien sai, odva vai hallot synnyttih. Nouzi häi halgoloin piäle, tahtoi ajamah lähtie, ga hebo ei lekahtai. – Pidäy sit regie vähäzel purgua, sanou häi. Lykkäi yhten halgozen, lykkäi toizen da luvettelou vai halgoloi lykkijes: – Ku et tädä voinne vediä, et ni tädä voi! Mugai lykki kai, vai yksi halgo jäi regeh. – Tämän taki voit vediä, duumaiččou mužikku. Nosti hallon olgupiäle, iče istavui regeh da lähti kodih ajamah. Vastah tulou mužikku da kyzyy: – Mindähbo halguo olgupiäl piet? – Hebo-kuluu žiälöičen, sellitti hallonkandai. – Tälleh kannellen on hevol kebjiembi minuu da regie vediä. – Ylen hyvä olet ristikanzu, sanoi kyzelii da matkai ielleh.