Texts
Return to list | edit | delete | Create a new | history | Statistics | ? Help
SUURI SELGI DA PIENI SELGI
SUURI SELGI DA PIENI SELGI
Livvi
New written Livvic
Nämmä
kaksi kyliä – Suuri Selgi da Pieni Selgi – ollah Anuksen čupul .Anuksespäi Suureh Selgih on kymmene kilometrii , Suures Sellispäi Pieneh Selgih – vähembi yhty kilometrii .Mollembat kylät ollah vahnat karjalazet kylät .Kylät ollah čomal kohtua , mägyričöil .
Suures Sellis on järvi , kylän päivänlaskuagjal .Pienes Sellis ei ole nigo järvie , nigo jogie , alandehel virduau vai pieni ojaine , kudamua sanotah Tordoiojakse .Yhtelläh vien hädiä kylis ei tietä .Viet Pienes da Suures Sellis ollah lähäl muapindua , sendäh kylis on ylen äijy kaivuo da vezi niilöis on ainos .
Rahvas pietäh kaivoloi kunnos , puhtastetah , ei čällätä .Enne , vie enne voinua da voinan jälles , Suuri da Pieni Selgi oldih suuret kylät .Rahvas mustetah , Pienes Sellis jälles voinua oli enämbi 40 taloidu .Tänäpäi jäi vähembi 20.Nelli perehysty kaikkiedah eläy kyläs ymbäri vuvven .Äijät tullah kyläh vaiku kezäkse .
Suures Sellis on enämbi taloidu da eläjiä sežo .Nuordu vai on vähä , enimät rahvas ollah vahnembua polvie .Kylät kučistuttih , konzu rahvahal loppih ruado .Rahvas ruattih kolhouzois , Pienes Sellis oli "Bol’ševik ", Suures Sellis – Udarnik-kolhouzu .Pienes Sellis paiči sarvipiädy žiivattua , kazvatettih lammastu da kanua .Vuvvennu 1959 nämmä kolhouzat hävitettih , rodih yhtehine Kuittizen souhozu .Pienes Sellis mustellah , oli vie paja da pikoipieni voizavodu .Pajah niškoi hiildy varustettih yölöil .Konzu kyläs hävitettih kolhouzu , paja siirrettih Suureh Selgih .
Voizavodale kyläläzet tuodih omua maiduo , jogahizel oli oma normu tuodavannu .Voizavodal luajittih kannatestu da ruahtuo , sidä viettih sit Anuksen maidozavodah .Oldihgo enne kluubat kylis , oldihgo laukat , oldihgo školat , oldihgo časounat .Täh päivässäh niilöis nimidä ei jiännyh .Kluubu Pieneh Selgih nostettih vuozien 1960 allus .Škola kyläs oli kahtes talois , nämmä taloit ku seizottih tyhjinny .Niilöin ižändät oldih elon sualois – meččyruadolois .Ruppijevien talois opastuttih viijenden da kuvvenden kluasan lapset , Räppijevien talois – toizen , nelländen da seiččemenden kluasan lapset .Kaheksandeh kluassah pidi lähtie opastumah Anukseh , kus lapset elettih internuatas .Vaiku nedälin lopukse tuldih kodih .Tänäpäi on yhtehine Suuri Selgi -kylä .Kul’tuuruministerstvan käskys vuvvennu 1998 se pandih histouriellizien eländykohtien luvetteluh .Enzi kerduahäi kyliä mainitah 1707 vuvvel .Kylis tässäh on säilynyh vahnua karjalastu taloidu , ala - da yläpertilöin kel , tahnuoloin da sarualoin kel .Net kuulutah histourii-kul’tuurizen perindön luvetteluh da ollah valdivon akkiloittavinnu .Pienes Sellis on kaksi mostu kodii : Ruppijevien (Pešoin kodi ) da Räppijevien da yksi Lekoin aittu .Suures Sellis on tundiettu Dubrovinan taloi , kudamas kuvattih monii kuulužii ven’alazii fil’moi .Sanakse , Suuren da Pienen Sellin taloloin nostandutaba sežo on perindölline .Net on nostettu riädyzeh nenga , ku yhten taloin bokkuikkunaspäi nävytäh kai dostalit taloit , kudamat ollah ielleh .Tämä vardoiččou kyliä tulipalolois .On kylih jiännyh myös vahnua kurrensiibiaidua da viiziseinästy kylyy .
Tänäpäi Suureh da Pieneh Selgih kävyy äijy turistua .Hyö kävväh muite kaččomah , tullahgi pruazniekoile .Suures Sellis pietäh Il’l’anpäiviä 2.elokuudu , Pienes Sellis – Spuasanpäiviä 19.elokuudu .Nämmä vahnat kyläpruazniekat on elävytetty Anuksen liygiläzien muzein vuoh .Niilöih joga vuottu tulou äijy pajattajua da soittajua , omua kylälästy da tulolastu gost’ua .
SUURI SELGI DA PIENI SELGI
Livvi
New written Livvic