Texts
Return to review | Return to list
Luadogu
history
January 19, 2023 in 16:10 Нина Шибанова
- created the text
- created the text: Karjalas on Jevroupan suurin suolatoivezine järvi – Luadogujärvi. Sen pinduala on 17700 nellikkökilometrii. Luadogan rannikko on enämbi 1000 kilometrii pitky. Järven syvin kohtu on 230 metrii. Luadogah virduau läs 40 jogie da suurdu ojastu. Suurin niilöis on Svirin jogi. Luadogaspäi ottau allun vaiku yksi ainavo jogi – Neva-jogi. Luadogal on enämbi 650 suardu. Suurin vuitti niilöis – läs 500 – on järven pohjazes puoles, Luadogan kallivosuariloin alovehel. Suurin Luadogan suari on Riekkalansuari. Kuulužat ollah Valamoin suaret. Luadogu on kalakas järvi. Sit on siigua, riäppöidy, kuor’oidu, lahnua, kuhua, särgii, ahvendu, haugii da muudu kalua. Vien lijastandan periä vähembi rodieu lohtu da torpua. Luadogan järves eläy ainavo t’ulieniloin laji – Luadogan n’orpu. Sen lugu vuvven 2000 tiedoloin mugah oli 4000-5000. Luadogan n’orpu on pandu Ven’an Ruskieh kniigah.Vuvven 2017 lopus Karjalah Luadogan kallivosuariloin alovehele perustettih Kanzalline Luadogan kallivosuaret-puusto. Täs puustos on ainavoluaduine mua da ilmasto, on äijy koskemattomua meččiä da harvinastu kazvii. Täl alovehel eläy Luadogan n’orpu. Kanzallizen puuston piälimäzenny ruavonnu on Luadogan kallivosuariloin luonnon akkiloiččemine.