Texts
Return to review | Return to list
Kyly kuldaine, löyly mezine
history
January 20, 2023 in 16:09 Нина Шибанова
- created the text
- created the text: Hyvä vastu kylys on suuri dielo. Gu sidä ei olle, nimittuine löyly ei auta. Ga se vie pidäy tiediä: kui da mil aigua vastu luadie. Vastua ottamah käydih heinykuun aigua. Iivanan da Pedrunpäivän väli oli kaikis paras aigu. Sidä välii sanottih Viändöin aijakse. Enne Iivananpäiviä ei suannuh varbua veičel leikata. Uskottih, gu sidä vigua pidänet, sit tulou hallu da syöy kai leivät. Sit tulou nälgyvuozi. Enne Iivananpäiviä meččy on ku roženču, sidä ei sua leikata. A Iivananpiän mečän ižändy avuau kai veriät: voit tulla da ottua lehtie, dai marjua, dai gribua. Vastua ottamah mendih kuivile kohtile da vie mägyriččöih nostih, gu elaigu perehes parenis. Puuhuot vallittih nuorembat da čomembat, ku tervehinny kaikin oldas. Ei suannuh ottua lehtie vahnois koivulois. Ei otettu ni ala-, ni ylävarboi koivus. Vallittih keskipuus. Vastua luajittih vai hyväs lehtes, puhtahas da vie kačottih, ku lehti olis libijäine. Sil lehtel nenäine on terävembi, a varvat karhakombat. Sidä kai kielel opittih: ongo libei vai ei. Se lehti ei kirbuo kylys kogo aijan. Dai on kylbie hyvä dai löylyn magien kylyh andau. Vastah ei suannuh panna varboi, kudamil kägöi kukui. Net lehtet oldih yhtes čuras ruskiet. Konzu kyly kylbiettih, vastua ei lykätty. Vastu nostettih lavvoile, sidä jätettih kylynižändän perehele, ku häi tulis da kylbevys. Päiväs piäliči vastu huuhtottih järves, sen jälles se otettih pertih latettu pyhkie. Viändöin aigah luajittihgi lembivastu. Katkottih koivu- da leppyvarboi yheksäs puus, keskeh pandih kaikenmoizii kukkii da ruistu. Sil vastal luguloin kel kylvetettih kylys tyttölöi, gu hyö oldas čomat da ozakkahat da terväh mendäs miehele.Oma pikoipikkaraine vastaine luajittihgi vastesuavule lapsuzele. Piendy lastu nikonzu ei jätetty yksinäh pertis. A gu tuli moine sluučei: pandih vastu kätkyön alle: gu karu ei ottas lastu, a lapsen tilah ei panis huabastu halguo. Se vastu vardoičči lastu. Vastas, kudamal kylbevyi muamo, leikattih varvat, jätettih vai tyvi. Sinne pandih palaine n’abarihmua da pikkaraine palaine midätahto raudahistu, sit se kai kriepittih paltinah. Se pandih lapsen pieluksen alle. Se kiäreh otettih keräle, konzu lähtiettih lapsen kel kylyh libo gostih. Tyttöine otti sen keräle, konzu ajoi ad’voih.