Texts
Return to list | edit | delete | Create a new | history | Statistics | ? Help
Sem’onov P’otr . Jänöit nagriskuopas
Sem’onov P’otr
Jänöit nagriskuopas
Livvi
New written Livvic
Rastavua
vaste Iivan lähti ottamah nagristu kuopas , kudai oli meččyhuuhtan piendarel .Häi ehti vai avata kuopan , gu kuuli šuhizuksen ihan tagimazes kuopan čupus .Iivan pöllästyi i ei ruohtinuh heittyö sinne , ruttozeh salbai kuopan da järilleh kiändyi kodih tyhjilleh .Kylän pihal hänele vastavuttih mužikat i kyzyttih :
– Iivan , sinä mindähbo kiännyit kodih tyhjilleh , et tuonnuh veresty nagristu Rastavakse ?
– Sendäh en tuonnuh – pöllästyin i en tiijä , kui olla , gu nagriskuopas oli sada jänöidy ! vastai Iivan häbevyksis .
Mužikat diivittihes , a yksi mies viippai käil :
– Tyhjiä bräyzähyt !Vambo yhteh kuoppah voijah liččavuo sada jänöidy !
– Olgah , anna ei olluh sadua , ga viizikymmen jänöidy oli ! Vastai Iivan .
– Ei voinnuh syndyö ni viittykymmen jänöidy nagriskuoppah ! ei usko toine mužikku .
– Ei gu lienne olluh viizikymmen , ga kaksikymmen jänöidy oli kielastamattah ! kiistäy Iivan .
– Opi vai smiettie , voijahgo kaksikymmen jänöidy mennä kuoppah ? kyzyy kolmas mužikku .
– Anna ei olluh kahtukymmen jänöidy , kymmene oli ihan tottu ! julgeni Iivan .
– Sidä kačo minä en usko ! Kuibo yhtyaigua kymmene jänöidy tungihes nagriskuoppah ?nelläs mužikku tartui paginah .
– Kymmendy jänöidy ku ei lienne olluh , sit viizi oli vältämättäh ! omal ottau Iivan .
– Sie ni viitty jänöidy ei olluh ! Sinä iče ethäi pannuh niidy kuoppah nagrehien piäle !vastai viijes mužikku .
– Ku ei lienne olluh viitty jänöidy , yksi jänöi oli varmah ! Annan piän poikki !Iivan piätti lopukse .
– Vikse sinun piä jo ammui on poikki , sendäh tyhjiä kiistät . Kuopas ei olluh ni yhty jänöidy , ku et lienne unohtannuh avvoi nagriskuoppua talvekse .Sinä et taki olluh silloi vie nengoine loukkopiä , vagavah sellitti kuvves mužikku .
Iivanal rodih ylen huigei da abei , gu händy ei uskottu , a vie kai čakattih .Häi painoi piän alah da mužikoispäi lähtijes burahtih :
– Kuibo ei olluh jänöidy ...Mibo sit šuhizi nagriskuopan pimies tagačupus ?...
Jänöit nagriskuopas
Livvi
New written Livvic
–
–
–