Texts
Return to list | edit | delete | Create a new | history | Statistics | ? Help
Lindgren Astrid . Peppi Pitkysukku
Lindgren Astrid
Peppi Pitkysukku
Livvi
New written Livvic
Oli
kajožu kezäildu , konzu Peppi enzi kerran harpai villan kynnykses piäliči .Tommi da Annika silaigua oldih ajeluksis .Muamah heidy työndi nedälikse ad’voih buaballuo .Sendäh hyö ei maltettu tiediä , ku susiedoin kodih jo tuldih eläjät .Ehtäl lapset tuldih kodih , a huondeksel seizottih pihaveriän ies kačellen pihua .Hyö ei ni tietty , ku uuzi dovariššu oli muga lähäl , a mietittih uuzii dieloloi da kižoi .Ihan sih minuuttah , konzu heil oli jo mieles , ku tämä päivy ei heile tuo nimidä mielenkiinittäjiä , avavui susiedoin pihaveräi da siepäi juokseldi tyttöine .
Se tyttöine oli ihan erinomaine .Nengostu tyttösty Tommi da Annika nikonzu ei nähty .Se oli Peppi Pitkysukku , kudai oli menemäs huondeskävelyle .Vot mittuine häi oli : Keldujuurikkoin värizet tukat oldih pletitty kahteh kiindieh kassah , kuduat törrötettih puoleh-toizeh .Nenä pohodi pieneh kartohkazeh , da se vie oli katettu kurmičoil , a suures suus nävyttih valgiezet hambahat .Tyttözen piäl oli sinine pluat’t’u , ga vikse kangastu ei täydynyh , sendäh ku erähät kohtat oli paikattu ruskieloil kangaspaikoil .Jallat hänen oldih hoikkazet da pitkät .Niilöih oli pandu pitkät erivärizet sukat : yksi sukku oli ruspakko , a toine – mustu .Vie oldih ylen suuret bašmakat , ihan kahtu kerdua pitkembät hänen jalguterii .Tuattah osti net hänelleh Suvi-Amierikas tuliekse aigua , konzu jallat kazvetah , ga Peppi nikui ei tahtonuh kengie toizii jallaččiloi .A Tommi da Annika vie enämbäl huaristeltih silmii hämmästyksis , konzu hyö nähtih oblezjanan vierahan tyttözen olgupiäl .Pienen martiškan piäl oldih moizet sovat : sinizet houzut da keldaine takkine , a piäs oli valgei olgišliäppy .Peppi astui pihua myö , yksi jalgu dorogal , toine – trotuaral .Tommi da Annika diivijen kačottih , ga häi kadoi toizele uuličale .A ylen terväh häi myös kiändyi järilleh , vaiku nygöi astui tagaperin .Astui häi muga , buiteku hänel oli laškus kiändiäkseh , konzu tahtoi mennä kodih päi .Häi tuli susiedoin lapsien edeh da azetui .Kodvan kaikin oldih vaikkani , kačottih toine toizeh .Sit jo Tommi kyzyi :– Miksebo sinä astut tagaperin ?
– Miksebo astun tagaperin ?
vastai kyzymyksel Peppi .
– A myö onnuako elämmö välläl mual , tovenhäi ?
Eigo voi joga ristikanzu kävellä muga , kui hänel himoittau ?A ku tahtonet tiediä , Jegiptas kaikin nenga kävelläh , eigo niken sidä kummastu .
Karjalakse kiännettih Tamara ŠČERBAKOVA da Aleksi RUUSKANEN
Peppi Pitkysukku
Livvi
New written Livvic