Texts
Return to list | edit | delete | Create a new | history | Statistics | ? Help
L’ubov’ Baltazar. Käby. 1
L’ubov’ Baltazar
Käby. 1
Livvi
New written Livvic
Pieluksen
alle olijan kellon iäni jo rubei suututtamah .Ei himoittas , ga nosta roih .Vähättävy on nelli čuassuu undu ...Maksim nouzi divanalpäi .Pidäy pezevyö , ajua pardu da juostojalgua azemale ...Matkureppu tuomazienke jo vuottau ukselluo .Raudutien varrel olii vokzualan rakendus on moine čoma , čoma sen torni da čuasut , dai sinizet kuuzet , lippu on enzimäzeh vagonah .Jiä tervehekse , ruadairahvahan linnu , tule terveh , otpusku .Muamanke pagin oli mennyt nedälil .Tuatto uvvessah on voimatunnuh , läžiy , ga verkoloi sendäh pidäy valmehel .Joga ildua keppizenke astuu aidassah , vuottau autobussua , eigo poigu tulis käymäh .Juna hil’l’akkazin libui ajamah , se vedi matkustajii luodehozah , sinne , kus jo oli kevät .Vagonan kaččoi keräi liput da jageli čuajut čomis raudahizis kehyksis .Rinnal ajamah ugodittih kaksi keski-ijän naistu da vanhu died’oi kirzukengis , valpastunnuos fufaikas da mečänkaččojan furažkas .Polvil died’oi pidi suurdu reppuu .
Naizet kogo aij an oldih iänes .Yksi saneli toizele , ku häi oli linnas tukkii leikatuttamas da löyhki , midä puutui ostua linnas da vie igävöičči omua lehmiä , kudai on kaikis paras kogo kyläs .Toine saneli , ku häi oli käymäs raudutien polikliiniekkah , kus pidi kävvä liäkärilöin luo da nygöi sai tiediä ku hänel roih lapsi .Perehes jo on kolme lastu , tämä roih jo nelläs , a ku neče kehno hos sanan vastah virkanou sit sen ajau iäres kaikkineh .Hänengi lehmy lypsäy kogonazen rengin maiduo .Died’oi istui vaikkaine , vai joga puolenčuasun peräs käi dabakkua poltamah tamburih dai joga kerdua nosti repun selgäh .Luzikat stokanois helistih junan rattahien peräh , net ajajes kovin komistih .Naizien iänet hävittih täh raudahizeh kolizendah dai Maksim uinoi .Hänen nostatti rajanvardoiččii , se oli dokumentoin tarkastus rajaalovehele mennes .Ristevysazemal juna kodvan oli sinne-tänne ähkittävänny dai enzimäine vagon jäi jälgimäzekse .Vie kaksi čuassuu matkua dai jo kodimuan valot ruvettih nägymäh .Maksim hyppäi vagonaspäi muale , vie viizikymmen metrii peronassah iespäi naine korgeikandahizis jallaččilois räbäitti muadu myö suurdu matkulaukkua .Häi nosti piän , silmis oldih kyynälet .
‒ Midäbo itket , luadigo ken pahua ?
‒ Alah heittyjes revitin sukat , sidä on abei .
Maksim nosti naizen sumkan dai kai häilähtih sen jygevytty .
‒ Kirpiččiägo vedelet ?
‒ T’outa ruadau Sordavalan poštal , luadi minul Dzek Londonan da Anton Čehovan kniigoin tilavukset , niidy on sumkas piäle kolmenkymmenen palua .
‒ Minul kai kebjiembi rodih , ku sain tiediä , kenen tevoksii kannan .
Tuldih raudutieazemale , se on kogo eländypaikan čomus .Kellon alle istui ylen suuri koiru .Koiran ni rovus ni karvas ei suannuh piästä perile , se oli kui tilkulois ommeltu kate .Koiru pyöritti piädy sinne-tänne , ga sidä niken ei huolinuh .Tulolazet kiirehtettih teriämbä piästä dokumentoin raja-tarkastukseh da ielleh ehtie varata ičele sija autobusas .
Autobusan šouferi , Čikal’ov Tol’a , heilutti Maksimale kätty , andajen tiediä ku vuottau vie kodvazen .Autobussu oli jo ihan täyzi , tagaveriäspäi kumardih ruskeitukkubriha .
‒ Оho , mies on naizenke , vuottakkua pikoi kodvaine .
Sit autobusas kuului diktoran Jurii Levitanan iäni :
‒ Kallehet matkustajat , olgua moizet hyvät , kaikin yhtes hengitämmö ilmua sydämeh dai kerras hengitämmö sen ilman iäres .
Kogo autobussu puhkei nagroh , ga sendäh veriän pordahazil rodih vällembi .
‒ Tulgua , tulgua , hyvä nuorižo , vai älgiä unohtakkua maksua ...
Tol’a azetti autobusan ihan aiduveriän luo , Maksim hyppäi alah da viiputti kätty mašinan peräh .Vastah oldih tulemas vanhembat da vanhu tuttavu Viktor .Muamo sebäi poijan da čuhkai korvah :
‒ Terveh , poigaine , mi on hyvä , ku tulit .
Tuatto ei nimidä sanonuh , seizoi keppizeh nojaten , huulet säristih dai kyynälet oldih silmis ...
Viktor juohatti lähtie kalastamah ylävirdah , kaikis ylembäzele järvele .Net kohtat Maksim tiezi hyvin , vie lapsennu hyö tuatanke sinne kalastamah käydih .Viktor nägyy jo aijemba oli smiettinyh sen , ku järvis on vie jiä sulamattah dai kai jovensuut on tävvet jiädy .Eigo kalastajat , eigo inspektorat piästä .Kogo matku , kai kuuzikymmen kilometrii dorogua talven jälles ollah yhty lundu .Lähtemmö kahtei Minskmotosiklal , yksi oružu da muudu nimidä keral , ku olis kebjei ajua .Kahten-kolmen päivän peräs sih puoleh lähtöy vedämäh produktoi pihkan keriäjile himleshozan mašin "Ural ", moine kudai piäzöy lumikivoksis läbi .Sil kyydil vanhembat työtäh meilegi verkot , motoran dai muut brujat .
Huondeksel lähtimmö matkah .Se vai sanuo on hoivu , dorogas yksi nimi jiännyh oli .Ylembä vie kudakui , a madalembis kohtis yhty vetty da ligua .Ga eihäi se ole este nuoril tervehil miehil !Kus ajettih motosiklal , kus kannettih sidä , ga piästih kylässäh .Tyhjät , ga vie ihan lujat taloit seizottih pitkin dorogua .Aijat kuadunuot , kylyzet järven rannal ku pöllästyksis painuttu randukivien välih .Maksim šuapkal pyhki hiet očas .
‒ Kuule , Vit’a , tämä kylä on olemas jo sadoi vuozii , enne tiä elettih hyvät rahvas . Mustan , konzu muamanke tänne käimmö , joga taloih kučuttih kui omii .Samvuaru stolal , piiruadu , šipainiekkua , čuajuu havvotun maijonke .Karjalakse kaikin paistih ...Nygöigi trolleibusas ajajes ku kuullen karjalakse paistah , ga žiäli on lähtie iäres ...Täs rinnal vie lespromhozan pos’olku enne oli , sigäläzet brihačut suvaittih sportua .‒ Se pos’olku , Maksim , jo ammui meile tuli , taloloin kohtal puudu kazvau . Dai kyliä mostu ymbäri kymmenäine löydyy .Yhtet on jo poltettu , muijil se samaine oza onnuako roih .Ga läkkä , raukku , ielleh ...
Käby. 1
Livvi
New written Livvic
‒
‒
Evstafeev, Sergei
Шишка. 1
Russian
‒
‒