Texts

Meččyjänöi

April 25, 2023 in 15:48 Нина Шибанова

created the text
created the text translation
created the text: Hyppiäldi omas pezäspäi varačču jänöihyt. Istuihes, kuundelou. Hirvei on varačul meččyjänöihyöl. Äijy sil mečäs on vihaniekkua. Vuottamattah hiivou viizas reboi, libo tembuau nälgähine hukku, libo hyppiäy puuspäi da peteldäy ravei ilves… Joga šohuu varuau meččyjänöi. Kridžahtahes puu – ozuttahes meččyjänöile, buite tullah vihazet hukat. Hyppiäldäy jalloin alpäi šlöpöihyt – sežo varaittau jänöihytty. Huuhkahtah yöl tuukkai – meččyjänöil syväin langieu. Vähiä vajai kaiken vuvven varavos eläy meččyjänöihyt. A kaikkie enämbäl varaittau sidä läbinägyjil syvyspäivil. Kunne ni vieris, kunne ni peittys, se nägyy loittonsah: ymbäri kai on keldaine, kullankarvaine, a houzuzet jänöirukal jo vallettih. Ni yöl, ni päiväl ei magua varačču meččyjänöi. Vuottau kui äijiäpäiviä, konzu tulou talvi, panou äijän lundu. Talvel meččyjänöi on valgei kaikkineh, vaiku korvien n’okkazet ollah mustat. Umbipäi menöy se lumikivokseh – niken sidä ei näi; ni viizas reboi, ni hukku, ni ravei ilves.